Sochlari orqali oltin olib chiqqan italiyalik xodim ushlandi

Italiyada mislsiz hiyla bilan amalga oshirilgan oltin o‘g‘irligi fosh etildi. La Repubblica nashri yozishicha, Milan yaqinida joylashgan qimmatbaho metall eritish korxonasida ishlagan 38 yoshli xodim bir yil davomida oltinlarni o‘zining uzun sochlari orasiga yashirgan holda korxonadan olib chiqib ketgan.

Uning qilmishlari faqatgina oltin xaridiga doir tekshiruv paytida fosh bo‘ldi. Politsiya tomonidan so‘ralgan hujjatlarga aniq javob bera olmagan erkak tekshiruv paytida shubhali harakatlari bilan e’tiborni tortdi. Natijada, undan qiymati 23 ming yevroga teng bo‘lgan 250 grammli oltin quymalari topildi. Uning uyida o‘tkazilgan tintuv chog‘ida yana bir qancha quymalar aniqlandi va tergov jarayonida u qilgan jinoyatlarini to‘liq tan oldi.

Ma’lum bo‘lishicha, erkak avvalroq Shveysariyadagi zargarlik fabrikasining ishchisi bo‘lib ishlagan va u yerdagi qo‘riqlash tizimidan mahorat bilan chetlab o‘tib, metall detektorlar orqali sezilmaydigan usulda — uzun sochlari ichida — oltinni yashirincha tashib chiqqan. Uning aytishicha, metall aniqlovchi uskuna sochlar sohasigacha tekshirish imkoniga ega bo‘lmagan.

Boshlang‘ich hisob-kitoblarga ko‘ra, ushbu xodim bir yil mobaynida jami 2 kilogrammga yaqin oltin — taxminan 150 ming yevro qiymatdagi metallni o‘g‘irlagan va shaxsiy manfaati yo‘lida sotib yuborgan.

Italiya politsiyasi xodimni ushlab, unga nisbatan jinoyat ishi qo‘zg‘atdi. Tergovchilar hozirda uning oltinni kimga sotgani va bu ishda boshqa kimlar ishtirok etganini ham aniqlashmoqda.

Ushbu voqea nafaqat jinoyatchi qo‘l urgan hiyla-sirlar bilan, balki xavfsizlik tizimlaridagi yetishmovchiliklarni ham yana bir bor ochiqlashga sabab bo‘ldi. Inson aql-zakovati qonundan ustun emasligini isbotlagan bu holat, jamiyatda jiddiy muhokamalarga sabab bo‘lmoqda. “Zamin”ni Telegramʻda oʻqing!