Eron prezidenti: Eron yadroviy qurol emas, tinchlik istaydi

Eron prezidenti Mas’ud Pizishkiyon parlamentdagi nutqi orqali jahon hamjamiyatiga aniq va ravshan signal yo‘lladi: Eron yadroviy qurol ishlab chiqarish niyatida emas va bu boradagi barcha shubhalar asossiz. Prezident ta’kidlashicha, mamlakat atom energiyasidan tinch maqsadlarda foydalanish huquqiga ega va bu huquqni hech kim inkor eta olmaydi.

Pizishkiyon so‘zlariga ko‘ra, Eronning rasmiy siyosati yadroviy quroldan voz kechishga asoslangan. Bu masalada mamlakat Oliy Rahnamo tomonidan ham bir necha bor qat’iy bayonot berilgan. "Kimki bu yo‘nalishga zid fikr bildirsa, u insonga Eron siyosiy tizimida o‘rin yo‘q", — dedi u.

Prezidentning fikricha, mamlakat ilmiy salohiyatidan faqat tinch va ijobiy maqsadlarda foydalanishi lozim. U shuningdek ta’kidladi: “Atom energiyasini tinchlik asosida qo‘llash — faqat huquqimiz emas, balki xalqaro shartnomalarda belgilangan haqli talabi hamdir. Bu boradagi ilmiy tadqiqotlar va amaliy ishlar Eron jamiyati taraqqiyotiga xizmat qilishi shart”.

Parallel ravishda, Eron tashqi ishlar vazirligi ham mamlakat Yadro qurolini tarqatmaslik to‘g‘risidagi shartnoma (NPT) doirasida o‘z majburiyatlariga sodiq qolishini ma’lum qildi. TIVning rasmiy bayonotida ta’kidlanishicha, Yaqin Sharqda yadroviy qurolga mutlaqo o‘rin bo‘lmasligi kerak.

Bunday tinch bayonotlarga qaramasdan, 13 iyun kuni Isroil Eron hududidagi bir qator yadro va mudofaa obyektlariga havo zarbalari berdi. Hujum natijasida Tehron va boshqa shaharlarda strategik inshootlar vayron qilindi. Eron bu agressiyaga javoban Isroil hududiga yuzlab raketa va dronlar orqali qarshi zarbalar yo‘lladi.

Muhim tomoni shundaki, o‘zaro hujumlar to‘rtinchi kun ham davom etmoqda. Eron rasmiylarining ta’kidlashicha, hujumlarda Islom inqilobi muhofizlari korpusi generallari, Qurolli Kuchlar bosh shtabi a’zolari va yadroviy sohadagi mutaxassislar halok bo‘lgan.

Bu eskalatsiya mintaqadagi barqarorlik va xavfsizlikka jiddiy tahdid solmoqda. Xalqaro tashkilotlar va yetakchi davlatlar har ikki tomonni tinchlikka chaqirmoqda. Ammo vaziyat tahlika bilan tobora chuqurlashmoqda.

Eronning tinch yadroviy siyosatga sodiq qolishi va Isroilning harbiy zarbalari orasidagi ziddiyat nafaqat Yaqin Sharq, balki butun dunyo xavfsizligi uchun sinovga aylandi. Vaqt ko‘rsatadiki, bu ziddiyat tinchlik tomon yo‘naladimi yoki yangi mojarolarga eshik ochadimi. “Zamin”ni Telegramʻda oʻqing!