Rossiya yangi “Oreshnik” raketasini ommaviy ishlab chiqarishga o‘tmoqda

Rossiya Federatsiyasi qurollanish sohasida yangi bosqichga qadam qo‘ymoqda. Prezident Vladimir Putinning ma’lum qilishicha, mamlakatda o‘rta masofali “Oreshnik” ballistik raketasining seriyali ishlab chiqarilishi boshlangan. Uning ta’kidlashicha, bu zamonaviy raketa jang maydonlarida o‘zining yuqori samaradorligini namoyon etgan.

“Armiya va flotni texnik jihatdan modernizatsiya qilish – ustuvor vazifalarimizdan biri bo‘lib qolmoqda. Ayniqsa, yadroviy triadani yanada mustahkamlashga katta e’tibor qaratamiz”, – dedi Putin. Uning qayd etishicha, 2025 yilda Rossiya strategik raketa qo‘shinlari uchun yangi “Yars” raketalari va modernizatsiyadan o‘tkazilgan Tu-160M raketa tashuvchi samolyotlari yetkazib beriladi.

“Oreshnik” raketasi esa Rossiyaning harbiy arsenalidagi so‘nggi texnik yutuqlardan biri bo‘lib, uning seriyali ishlab chiqarilishi mamlakatning strategik imkoniyatlarini yanada kengaytirishga xizmat qiladi. Putin ushbu raketani “jangovar sharoitlarda o‘zini juda yaxshi ko‘rsatgan” deb ta’rifladi.

Harbiy-dengiz floti ham e’tibordan chetda qolmayapti. Rossiya floti tarkibiga yangi avlod yuqori aniqlikdagi qurollar bilan jihozlangan kemalar va suvosti kemalari kiritilishi rejalashtirilgan. Davlat rahbari ta’kidlaganidek, G‘arb davlatlari va NATOning bosimi Rossiyani himoya qobiliyatini yanada mustahkamlashga majbur qilmoqda.

“NATO yangi dasturlar orqali harbiy salohiyatini kengaytirmoqda, bunda alyansga a’zo davlatlar o‘z xarajatlarini keskin oshirmoqda. Natijada, global qurollanish poygasi yanada kuchaymoqda”, – dedi Putin.

Ma’lumot uchun, Stokgolm xalqaro tinchlik tadqiqotlari instituti (SIPRI) ma’lumotlariga ko‘ra, 2025 yil boshiga kelib Rossiya 592 ta strategik raketa tashuvchiga ega. Ular orasida 206 ta “Yars”, 78 ta “Topol-M”, 34 ta “Avangard” va 34 ta “Voyevoda” raketalari bor.

Har bir “Yars” raketa to‘rtta 250 kilotonna quvvatga ega jangovar kallak bilan jihozlangan. Bunday arsenal mamlakatning harbiy salohiyati va suverenitet kafolati sifatida xizmat qilmoqda.

Rossiya tomonidan amalga oshirilayotgan bu keng qamrovli modernizatsiya dunyodagi harbiy muvozanatga sezilarli ta’sir ko‘rsatishi mumkin. Mahalliy va xalqaro tahlilchilar esa mazkur jarayonlarni diqqat bilan kuzatishda davom etmoqda. “Zamin”ni Telegramʻda oʻqing!