Turkiya sayyohlar yurtiga aylandi: 4-o‘ringa chiqdi!

So‘ngi yillarda dunyo sayyohlari uchun eng sevimli manzillardan biriga aylangan Turkiya 2024 yil yakunlari bo‘yicha tarixiy natijalarni qayd etdi. Birlashgan Millatlar Tashkilotining Jahon Turizm Tashkiloti (UNWTO) tomonidan e’lon qilingan “Jahon Turizm Barometri” ma’lumotlariga ko‘ra, Turkiya dunyoda eng ko‘p turist qabul qilgan mamlakatlar ichida 4-o‘rinni egalladi.

2024 yil davomida mamlakatga tashrif buyurgan xorijlik sayyohlar soni 56,7 million nafarga yetdi. Bu ko‘rsatkich orqali Turkiya o‘z o‘rnini bir pog‘ona yaxshilab, 2023 yildagi 5-o‘rindan 4-o‘ringa ko‘tarildi. Umumiy mehmonlar soni esa 62,3 million nafarga yetib, mamlakatning turizm sohasidagi izchil va barqaror o‘sishini yana bir bor namoyon etdi.

Turkiya Madaniyat va turizm vaziri Mehmet Nuri Ersoy mazkur muvaffaqiyat haqida shunday dedi:
“Turkiya bugun dunyoda nafaqat kuzatiladigan, balki o‘rnak olinadigan turizm davlatlaridan biriga aylandi. Bu natijalar tarixiy va madaniy merosimizning samarali targ‘ib qilinishi, zamonaviy infratuzilmamiz hamda turizmning barcha fasllarda mavjud xilma-xil turlarini rivojlantirish samarasidir”.

Jahondagi eng ko‘p turist qabul qilgan beshlikda Fransiya, Ispaniya va AQSH singari sayyohlikda yetakchi davlatlar bilan bir qatorda Turkiya va Italiya ham joy olgan. Bu esa Turkiyaning xalqaro turizm arenasidagi nufuzini yanada mustahkamlayotganini ko‘rsatadi.

Mamlakatning boy tarixi, bebaho madaniy yodgorliklari, bahavo dengiz sohillari, gastronomik turizm imkoniyatlari va mehmondo‘stlik an’analari Turkiyani turli millat va madaniyat vakillari uchun jozibali nuqtaga aylantirmoqda.

Turizm sohasida bunday ulkan yutuqlar esa nafaqat iqtisodiy o‘sishga, balki mamlakat imijiga ham ijobiy ta’sir ko‘rsatishi shubhasiz. “Zamin”ni Telegramʻda oʻqing!