Janubiy Koreya sudi Samsung rahbarini oqladi

Janubiy Koreya Oliy sudi Samsung Electronics kompaniyasi boshqaruvi raisi Li Chje Yonni Cheil Industries va Samsung C&T kompaniyalari qo‘shilishi bo‘yicha sud jarayonida oqladi, deb xabar berdi Kursiv.media.

Prokuratura uni besh yil qamoq jazosiga hukm qilishni talab qilgan edi. U firibgarlik, moliyaviy hujjatlarni soxtalashtirish, ishonchni suiiste’mol qilish va boshqa jinoyatlarda ayblanayotgan edi.

Ayblovlarga ko‘ra, bu qonunga xilof harakatlar 2015 yilda sodir etilgan. O‘sha vaqtda Li Chje Yon kompaniya direktorlar kengashining vitse-prezidenti bo‘lgan va otasi Li Gon Xi sog‘lig‘i yomonlashgani sababli amalda kompaniyani boshqargan. U rasman 2022 yilda boshqaruv raisi etib tayinlangan.

Sud qarori e’lon qilinganidan so‘ng Samsung aksiyalari savdo boshlangan vaqtda 0,6 foizga o‘sdi. Kompaniyaning kelajakdagi yutuqlari asosan yarimo‘tkazgichlar sanoatini tiklash va sun’iy intellekt texnologiyalarini rivojlantirishga bog‘liq bo‘ladi. “Zamin”ni Telegramʻda oʻqing!