AQShning Kaliforniya shtatida kuchli o‘rmon yong‘inlari yuz bermoqda. ABC xabariga ko‘ra, yong‘inni o‘chirish uchun 1000 nafardan ortiq qutqaruvchilar safarbar etilgan.
Olov asosan Santa-Barbara va San-Luis-Obispo okruglarida joylashgan Los-Padres milliy bog‘i hududini qamrab olgan. Yong‘in hozirgacha 30 ming gektardan ortiq maydonni yondirib yuborgan.
Mahalliy hukumat vakillari ma’lum qilishicha, yong‘in natijasida 3 kishi halok bo‘lgan, jabrlangan hududlardan esa aholi evakuatsiya qilinmoqda. Hozirda 460 ta turar-joy va boshqa ob’ektlar xavf ostida ekani ta’kidlanmoqda.
Yong‘in 1-avgust kuni boshlangan va hozirgacha to‘liq nazoratga olinmagan. Haroratning balandligi va kuchli shamol yong‘inning tez tarqalishiga olib kelmoqda. Mutasaddilar aholiga xavfsizlik choralariga qat’iy rioya qilishni tavsiya qilmoqda.
“Zamin”ni Telegramʻda oʻqing!
