Tojikistonda siyosiy sahnadagi e’tibor markaziga yangidan chiqqan shaxs — mamlakat prezidenti Imomali Rahmonning kenja qizi Farzona Imomali bo‘ldi. U Sog‘liqni saqlash va aholini ijtimoiy muhofaza qilish vazirligi markaziy apparatidagi islohotlar, birlamchi tibbiy yordam va xalqaro aloqalar boshqarmasi boshlig‘i lavozimiga tayinlandi. Bu haqda vazirlik matbuot xizmati ma’lumot berdi.
Rasmiy xabarda ta’kidlanishicha, Farzona Imomalining yosh bo‘lishiga qaramay, kasbiy mahorati va tajribasi inobatga olingan holda shunday mas’uliyatli vazifa topshirilgan.
Ilgarigi faoliyati
2021 yildan buyon u shu boshqarmada mutaxassis sifatida ishlab kelgan. Farzona Imomali tibbiyot sohasidagi faoliyati bilan birga xalqaro hamkorlik yo‘nalishida ham tajriba to‘plab ulgurgan.
Tarjimayi hol va ta’lim
1998 yil 4 iyulda Dushanbe shahrida tug‘ilgan Farzona ilk ta’limini mahalliy o‘rta maktabda olgan. Keyinchalik Lomonosov nomidagi Moskva davlat universiteti litseyining Dushanbe filialida o‘qib, 2014 yilda uni a’lo baholar bilan tugatgan. Shu yili Abu Ali ibn Sino nomidagi Tojikiston davlat tibbiyot universitetining davolash fakultetiga kirib, 2020 yilda imtiyozli diplom bilan bitirgan.
2022 yilda pediatriya yo‘nalishi bo‘yicha klinik ordinaturani, 2023 yilda esa Prezident huzuridagi Davlat boshqaruvi akademiyasining Davlat boshqaruvi fakultetini ham imtiyozli diplom bilan tamomlagan.
Shaxsiy hayot
Farzona Imomali — Tojikiston Xalq demokratik partiyasi a’zosi. U oila qurmagan, biroq bir farzand tarbiyasi bilan shug‘ullanadi.
Mutaxassislar fikricha, uning yangi lavozimi mamlakatdagi tibbiyot islohotlariga yangi sur’at berishga xizmat qilishi mumkin.
“Zamin”ni Telegramʻda oʻqing!
