Vetnam hukumati mamlakatning bir nechta hududlarida aholini xavfsizlik maqsadida ommaviy ravishda evakuatsiya qilish to‘g‘risida qaror qabul qildi. Rasmiy ma’lumotlarga ko‘ra, falokatli kuchga ega “Kadziki” to‘foni 25 avgust kuni sohilga yetib kelishidan oldin 586 mingdan ortiq fuqaro xavfli hududlardan ko‘chiriladi. Bu haqda CNBC manbalari xabar berdi.
Ma’lumotlarga qaraganda, “Kadziki” 20 avgust kuni Filippin yaqinidagi dengizda shakllangan bo‘lib, keyinchalik tez sur’atda kuchayib, Xitoy va Vetnam yo‘nalishiga qarab harakatlana boshlagan. Hozirda to‘fon ichida shamol tezligi soatiga 200 kilometrga yaqinlashgani qayd etilmoqda. Sinoptiklarning baholashicha, u sohilga yetib kelganda 300–400 millimetrgacha yog‘ingarchilik olib kelishi mumkin. Bu esa to‘fon ortidan suv toshqinlari va ko‘chkilar xavfini oshiradi.
Bundan tashqari, kuchli shamol ta’sirida dengizdagi to‘lqinlar balandligi 2–4 metrgacha ko‘tarilishi ehtimol qilinmoqda. Mintaqadagi taxminan 60 mingga yaqin kichik qayiq va kema egalari oldindan ogohlantirilgan.
To‘fon nafaqat aholi xavfsizligiga, balki mamlakat qishloq xo‘jaligiga ham katta zarar yetkazishi mumkin. Mutaxassislar hisob-kitobiga ko‘ra, 300 ming gektardan ziyod guruch maydonlari hamda 77 mingta mevali daraxt plantatsiyalari yo‘qotishlarga uchrashi mumkin.
Vetnamning yirik aviakompaniyalari — Vietnam Airlines va Vietjet Aviation esa hozirdanoq xavfsizlik chorasi sifatida mamlakat markaziy shaharlariga qaratilgan bir qator reyslarni bekor qilishga majbur bo‘ldi.
Mutasaddilarning ta’kidlashicha, bu holat so‘nggi yillarda Vetnamda kuzatilgan eng yirik tabiiy ofatlardan biri bo‘lishi mumkin. Shu bois hukumat barcha resurslarni safarbar qilib, evakuatsiya va qutqaruv ishlarini qat’iy nazorat ostida amalga oshirmoqda.
“Zamin”ni Telegramʻda oʻqing!
