Avstraliyaning Sidney shahrida Rossiya Bosh konsulligi oldida kutilmagan va shov-shuvli holat sodir bo‘ldi. 1 sentyabr kuni ertalab oq rangli yo‘ltanlamas mashina Rossiya konsulligining temir darvozasiga kelib urildi. Bu haqida mahalliy OAV, jumladan ABC telekanali xabar tarqatdi.
Ma’lumotlarga ko‘ra, voqea mahalliy vaqt bilan soat 8:00 atrofida ro‘y bergan. Yangi Janubiy Uels politsiyasiga konsullik hududi yaqinida turgan shubhali avtomobil haqida xabar kelib tushgan. Hodisani o‘rganish uchun yetib kelgan politsiya xodimlari 39 yoshli haydovchi bilan suhbat o‘tkazishga uringan paytda u to‘satdan mashinani ishga tushirib, konsullik hududiga kirib borgan. Biroq harakat uzoqqa cho‘zilmagan — avtomobil faqatgina temir darvozaga urilib to‘xtagan.
Hodisadan so‘ng haydovchi hibsga olingan va politsiya bo‘limiga olib ketilgan. Konsullik darvozasiga urilgan mashina esa evakuator yordamida hududdan olib chiqib ketilgan.
Hozirda mazkur voqea bo‘yicha tergov ishlari davom etmoqda. Rasmiylar ma’lum qilishicha, tekshiruv jarayoniga Avstraliya federal politsiyasi ham jalb etilgan.
Ayni paytga qadar Rossiya tomoni hodisa yuzasidan hech qanday rasmiy bayonot bermagan. Mutaxassislar esa bu harakatning sabablari, haydovchining shaxsiy motivlari va unga nisbatan qo‘llanilishi mumkin bo‘lgan jazo choralari yuzasidan surishtiruv olib borilmoqda.
Shu tariqa, Sidneydagi Rossiya konsulligi oldidagi g‘ayrioddiy hodisa xalqaro ommaviy axborot vositalari va jamoatchilikning katta e’tiborini o‘ziga tortdi.
“Zamin”ni Telegramʻda oʻqing!
