AQSH prezidenti Donald Tramp Rossiyaning uchuvchisiz qurilmalari Polsha havo hududiga kirib borishi haqida fikr bildirdi. Uning so‘zlariga ko‘ra, bu harakat ehtimol tasodifiy xatolik oqibatida sodir bo‘lgan bo‘lishi mumkin, ammo baribir bu holatdan norozi ekanini ta’kidladi.
Bloomberg tarqatgan ma’lumotga ko‘ra, 12 sentyabr kuni Oq uyda jurnalistlar bilan muloqot chog‘ida Tramp quyidagicha izoh bergan: «Bu xatolik bo‘lgan bo‘lishi ehtimoldan xoli emas. Lekin baribir men bunday vaziyatdan qoniqmaganman. Umid qilamanki, bu jarayon tez orada yakunlanadi».
Shu bilan birga, Tramp Rossiyani «hatto shunday chiziqqa yaqinlashgani uchun ham» keskin tanqid qildi. «Menga bu ma’qul emas. Men bundan rozi emasman», deya qayd etdi u.
Ma’lumot uchun, 10-sentyabrga o‘tar kechasi Rossiya Ukrainaga keng ko‘lamli havo hujumlari amalga oshirayotgan bir paytda kamida 19 ta dron Polsha chegarasi orqali o‘tib ketgan. Ularga qarshi nafaqat Polsha harbiy havo kuchlari, balki boshqa NATO davlatlarining qiruvchi samolyotlari ham jalb qilingan.
Dron parchalari Belarus va Ukraina chegarasiga yaqin Viriki qishlog‘idagi turar joy binosiga ziyon yetkazgan, ammo inson talafotlari qayd etilmagan.
Shu tariqa, voqea atrofida keskin siyosiy bahslar davom etmoqda va bu jarayon NATO bilan Rossiya o‘rtasidagi munosabatlarda yanada jiddiy tortishuvlarga olib kelishi mumkinligi ta’kidlanmoqda.
“Zamin”ni Telegramʻda oʻqing!
