Eurasianet tarqatgan ma’lumotlarga ko‘ra, Donald Tramp tarixda Markaziy Osiyoga tashrif buyurgan birinchi AQSH prezidenti bo‘lishi ehtimoldan holi emas.
Nashr eslab o‘tganidek, prezident Shavkat Mirziyoyev Trampni Toshkentga taklif qilib kelmoqda. O‘zbekiston tomoni bir necha bor rasmiy taklif yo‘llagan, shuningdek, aprel oyida tashqi ishlar vaziri Baxtiyor Saidov boshchiligidagi delegatsiya Oq uyga shaxsan taklifnomani topshirgan.
Ma’lumki, 2018-yilda Mirziyoyev AQSHga tashrif buyurib, Oq uyda Donald Tramp bilan uchrashgan edi. O‘sha paytda Amerika rahbari Mirziyoyev haqida “juda hurmatli inson” deb baho bergani tarixdan o‘rin olgan.
Joriy yilning 5-sentyabr kuni bo‘lib o‘tgan telefon suhbatida ham Mirziyoyev Trampga “qulay vaqtda” O‘zbekistonga kelishi uchun taklifni takrorlagani aytiladi.
Shunga qaramay, nashrning Vashingtondagi manbalari 9-sentyabr holatiga ko‘ra, hali Markaziy Osiyoga safar qilish haqida aniq qaror qabul qilinmaganini ta’kidladi.
Eurasianet tahlilchilari Trampning ehtimoliy tashrifi faqat O‘zbekiston bilan chegaralanmasdan, Qozog‘iston yo‘nalishini ham o‘z ichiga olishi mumkin, deya taxmin bildirishmoqda.
Shu tariqa, agar tashrif amalga oshsa, bu tarixiy voqea bo‘lib, Markaziy Osiyo va AQSH munosabatlarida yangi sahifa ochishi kutilmoqda.
“Zamin”ni Telegramʻda oʻqing!
