Tailandda yuz bergan g‘aroyib hodisa butun ijtimoiy tarmoqlarda muhokamalarga sabab bo‘ldi. Udon Thani provinsiyasida yashovchi 30 yoshli Pakin ismli erkak zargarlik do‘konidan qimmatbaho uzukni o‘g‘irlab, o‘zini qasddan hibsga olishlarini istagan.
Ma’lumotlarga ko‘ra, u do‘konga kirib, sotuvchilardan “Agar men shu uzuk bilan chiqib ketsam, meni hibsga olishadimi?” deb so‘ragan. Javobini eshitgach esa uzukni olib, qo‘rqmasdan tashqariga yo‘l olgan.
Do‘kon xodimlari uni darhol ushlab, politsiyaga topshirishgan. Eng qizig‘i, Pakin hech qanday qarshilik ko‘rsatmagan va o‘z qilmishini ataylab sodir etganini tan olgan. U so‘roq paytida avval ham qamoqda bo‘lganini, ozodlikdagi hayot unga og‘irlik qilganini va qamoqdagi qat’iy tartibni afzal ko‘rishini ta’kidlagan.
Uning aytishicha, oilaviy muammolar va narkotik moddalarga qaramlik sabab jamiyatdan uzilgandek his qilgan. Shu bois u hech ikkilanmasdan qamoqqa qaytish uchun jinoyat yo‘lini tanlagan.
Shu bilan birga, do‘kon egasi unga qarshi hech qanday da’vo ariza bermagani bois, Pakinga o‘g‘rilik bo‘yicha jazo tayinlanmadi. Biroq politsiya uning narkotik moddalarga bog‘liqligini inobatga olib, unga ayblov qo‘ydi va reabilitatsiya markaziga yubordi.
Mutaxassislar ta’kidlashicha, bunday holatlar insonning ruhiy qiyinchiliklari va ijtimoiy moslashuv muammolaridan dalolat beradi. Jamiyatdagi yordam va psixologik qo‘llab-quvvatlash tizimi kuchli bo‘lmasa, insonlar hatto qamoqni ham erkinlikdan afzal ko‘rishi mumkin.
“Zamin”ni Telegramʻda oʻqing!
