Albaniya siyosiy maydonida tarixiy voqea ro‘y berdi — mamlakat parlamentida sun’iy intellekt asosida yaratilgan birinchi virtual vazir Diella nutq so‘zlaganidan so‘ng yig‘ilish tartibsizlikka aylandi. Bu haqda Albanian Times xabar tarqatdi.
Ma’lumotlarga ko‘ra, 18-sentyabr kuni parlamentda hukumat dasturi taqdim etildi va yangi kabinetga ishonch bildirish masalasi ko‘rib chiqildi. Sessiya kutilganidan ancha qisqa bo‘lib, atigi 24 daqiqa davom etdi. 82 nafar sotsialist deputat bosh vazir Edi Rama taklif etgan kabinet tarkibini ma’qulladi. Shundan keyin spiker Niko Peleshi yig‘ilishni yopiq deb e’lon qildi.
Biroq Diella — davlat xaridlari uchun mas’ul qilib tayinlangan sun’iy intellekt vaziri sahnaga chiqishi muxolifat tomonidan keskin qarshi olindi. Deputatlar stollarni taqillatib, yig‘ilishni buzishga urinishdi. Hatto ular qo‘llariga tushgan Konstitutsiya kitoblari va suvli idishlarni bosh vazir hamda hukumat a’zolariga uloqtirishdi.
Ijtimoiy tarmoqlarda tarqalgan videolarda voqea qanday kuchayganini ko‘rish mumkin. Hatto xorijlik elchilar ham zalda o‘tirgan holda, quloqchin taqib, mojaroni kuzatgani tartibsizliklarni to‘xtatishga yordam bermadi. Qisqa tanaffus ham vaziyatni yumshatmadi.
Diella esa o‘z nutqida o‘zini himoya qildi. U Konstitutsiyaga zid ravishda tayinlanmaganini ta’kidlab, deputatlardan o‘z vazifasiga erta baho bermaslikni so‘radi. Sun’iy intellekt vaziri o‘z bayonotida konstitutsiya qoidalarini yodga soldi va mamlakat rivojiga qo‘shadigan hissasi haqida gapirdi.
Eslatib o‘tamiz, 12-sentyabr kuni Albaniya hukumati tarixiy qaror qabul qilib, sun’iy intellekt asosida ishlaydigan modelni davlat xaridlari uchun mas’ul vazir sifatida tayinlaganini ma’lum qilgan edi.
Bu voqea Albaniyada siyosiy hayotda yangi bosqich boshlanganini ko‘rsatmoqda. Biroq muxolifatning qattiq qarshiligi bu tajribani qanchalik davomli bo‘lishi haqida katta savollar uyg‘otmoqda.
“Zamin”ni Telegramʻda oʻqing!
