Rossiyada demografiya bo‘yicha so‘nggi yillarda keskin o‘zgarish kuzatilmoqda. Civixplorer kompaniyasi tomonidan o‘tkazilgan tadqiqot natijalariga ko‘ra, mamlakat aholisi tarkibida erkaklar ulushi sezilarli darajada kamayib ketgan.
Ayollar soni ustunlik qilmoqda
2024 yilgi hisobotda Rossiya aholisining 63 foizi ayollar, atigi 37 foizi esa erkaklar ekani qayd etilgan. Mutaxassislar bu holatning asosiy sabablaridan biri sifatida 2022 yildan beri davom etayotgan Ukraina bilan urushi va unda yuz bergan yo‘qotishlarni tilga olishmoqda.
Shuningdek, tadqiqotda Rossiya bilan bir qatorda ayollar soni ko‘pchilikni tashkil etadigan mamlakatlar ham sanab o‘tilgan. Masalan:
AQSH — 52,7% ayollar, 47,3% erkaklar;
Braziliya — 53,3% ayollar, 46,7% erkaklar;
Bangladesh — 53,8% ayollar, 46,2% erkaklar;
Meksika — 54,4% ayollar, 45,6% erkaklar;
Yaponiya — 55,5% ayollar, 44,5% erkaklar;
Germaniya — 52,3% ayollar, 47,7% erkaklar;
Tailand — 55% ayollar, 45% erkaklar.
Pensionerlar orasida katta tafovut
Joriy yil may oyida e’lon qilingan ma’lumotlarga ko‘ra, Rossiyada pensiya yoshidagi ayollar erkaklardan deyarli ikki baravar ko‘p. Rossiya Ijtimoiy jamg‘armasi ma’lumotlariga asoslansak, mamlakatda 41 million 169 ming 800 nafar nafaqaxo‘r istiqomat qiladi. Ulardan 13 million 845 ming 500 nafari erkaklar bo‘lsa, ayol pensionerlar soni 27 million 324 ming 300 nafarni tashkil etmoqda.
Demografik xavflar
Mutasaddilar ta’kidlashicha, bunday tengsizlik nafaqat aholi tarkibidagi muvozanatga ta’sir qiladi, balki iqtisodiy rivojlanish, mehnat bozori va ijtimoiy siyosatda ham jiddiy muammolarni keltirib chiqarishi mumkin. Demografik muvozanatning buzilishi Rossiya kelajakda yanada katta ijtimoiy sinovlarga duch kelishi ehtimolidan darak bermoqda.
“Zamin”ni Telegramʻda oʻqing!
