Janubiy Filippinda 10 oktyabr kuni 7,4 magnitudali kuchli zilzila sodir bo‘ldi. Bu haqda Filippin vulqonologiya va seysmologiya instituti (PHIVOLCS) ma’lum qildi. Seysmologlarning aytishicha, zilzilaning epitsentri Davao Oriyental viloyatining Manay shahri yaqinida, dengiz tubida joylashgan bo‘lib, zarbaning chuqurligi taxminan 23 kilometrni tashkil etgan.
Kuchli yer tebranishidan keyin mamlakatning bir qator sohil hududlarida sunami xavfi haqida ogohlantiruv berildi. Rasmiylar aholini yuqori yerlarga evakuatsiya qilishga chaqirdi. Dastlabki ma’lumotlarga ko‘ra, kuchli to‘lqinlar xatarini kamaytirish maqsadida sohildagi maktablar va turizm obyektlari vaqtincha yopilgan.
Mahalliy OAV xabar berishicha, zilzila oqibatida kamida bir kishi halok bo‘lgan, bir nechta binolar va turar joylarga zarar yetgan. Davao shahridagi ayrim ta’lim muassasalarida talabalar shoshilinch ravishda evakuatsiya qilingan, bir necha kishi yengil tan jarohati olgan. Davao xalqaro aeroportida qisqa vaqtga parvozlar to‘xtatilgan, ammo tez orada faoliyat qayta tiklangan.
Prezident Ferdinand Markos Junior vaziyatni shaxsan nazoratga olganini ma’lum qildi. Hukumat tomonidan qutqaruv va tezkor baholash ishlari boshlab yuborildi. Shuningdek, jabr ko‘rgan aholiga yordam ko‘rsatish uchun maxsus shtab tuzilgan.
Seysmologlar ta’kidlashicha, Filippin Tinch okeanida joylashgan “Olov halqasi” deb ataladigan faol seysmik mintaqada joylashgani bois, bu yerda yer qimirlashi tez-tez sodir bo‘lib turadi. So‘nggi yillarda Sebu va Mindanao hududlarida ham shunday kuchli zilzilalar qayd etilgan va ularning ayrimlari katta iqtisodiy zarar keltirgan.
Mahalliy hokimiyat va xalqaro tashkilotlar aholini rasmiy manbalar orqali axborotni kuzatib borishga, ehtiyotkorlik choralariga qat’iy amal qilishga chaqirmoqda. Mutaxassislar seysmik faollik davom etishi mumkinligini bildirmoqda, shuning uchun hududda yuqori darajada tayyorgarlik holati saqlanmoqda.
Filippindagi ushbu zilzila so‘nggi yillarda qayd etilgan eng kuchlilaridan biri sifatida baholanmoqda.
“Zamin”ni Telegramʻda oʻqing!
