Osiyo taraqqiyot banki (OTB) O‘zbekiston iqtisodiyotiga 500 million dollar miqdorida qarz ajratishni ma’qulladi, deb Kursiv.media xabar berdi. Mablag‘ “Iqtisodiy boshqaruvni takomillashtirish dasturi” (2-bosqich) doirasida taqdim etiladi.
Dastur orqali davlat korxonalarini zamonaviy boshqarish, fiskal shaffoflikni oshirish va raqobatbardosh iqtisodiy muhitni shakllantirish maqsad qilingan. Bu amalga oshirilayotgan islohotlarning uzviy davomi sanaladi.
OTBning O‘zbekistondagi vakolatxonasi direktori Kanokpan Lao-Araya ta’kidlashicha, bank mamlakatni JSTga a’zo bo‘lish va global iqtisodiyotda chuqurroq ishtirok etish sari harakatlarida qo‘llab-quvvatlashga sodiq.
Dastur quyidagi yo‘nalishlarda islohotlarni o‘z ichiga oladi:
davlat-xususiy sheriklikda yagona tartiblarni joriy etish;
raqobat va investitsiyani boshqarish bo‘yicha yangi qonunlar qabul qilish;
davlat korxonalarini xalqaro standartlar asosida boshqarish;
soliq bazasini kengaytirish va xalqaro soliq hamkorligini rivojlantirish;
korrupsiyaga qarshi kurash va manfaatlar to‘qnashuviga qarshi qonunchilik joriy etish.
Shuningdek, dastur ijtimoiy himoya tizimini kuchaytirishni ham nazarda tutadi. Bu aholining zaif qatlamlariga islohotlar ta’sirini yumshatishga qaratilgan.
Ma’lumot uchun, joriy yilda O‘zbekiston va OTB hamkorligiga 30 yil to‘ldi. 1995-yildan buyon bank mamlakatga 14,6 milliard dollarlik yordam ko‘rsatgan.
OTB 30-sentabrda e’lon qilgan hisobotida O‘zbekiston iqtisodiy o‘sishi prognozi o‘zgarmaganini bildirgan. 2025-yilda o‘sish 6,6 foiz, 2026-yilda esa 6,7 foiz bo‘lishi kutilmoqda.
“Zamin”ni Telegramʻda oʻqing!
