Turkiya va O‘zbekiston o‘rtasida strategik sheriklik yangi bosqichga ko‘tarilishi mumkin. Turkiya Ichki ishlar vazirligida bo‘lib o‘tgan uchrashuvda ikki davlat fuqarolari uchun qulaylik yaratishga qaratilgan qator tashabbuslar muhokama qilindi, deb xabar berdi mahalliy OAV.
Uchrashuvda vazir o‘rinbosari Mehmet Aqtash O‘zbekiston bilan munosabatlar izchil rivojlanayotganini ta’kidlab, fuqarolar uchun bir nechta yangi imkoniyatlar haqida ma’lumot berdi.
Jumladan, Turkiya hukumati O‘zbekiston fuqarolari uchun ish vizasini elektron tarzda rasmiylashtirish tizimini joriy etishni ko‘rib chiqmoqda. Bu hujjat to‘plash va ariza berish jarayonini ancha soddalashtiradi.
Shuningdek, mamlakatda bo‘lib turgan o‘zbekistonliklar Turkiyani tark etmasdan turib, ishlash ruxsatnomasini olish imkoniga ega bo‘lishi mumkinligi muhokama qilingan.
Tomonlar noqonuniy migratsiyani tartibga solish va qonun buzgan fuqarolarni aniqlash uchun yagona elektron ma’lumot bazasini yaratish masalasida ham kelishuvga yaqinlashgan.
Qo‘shimcha ravishda, ikki mamlakat ichki ishlar vazirliklari noqonuniy migratsiyaga qarshi kurash va fuqarolarni qaytarish bo‘yicha memorandum tayyorlamoqda.
Turkiya Tashqi ishlar vazirligidagi uchrashuvda esa vazir o‘rinbosari Musa Kulaklikaya ikki davlatni bog‘lab turgan tarixiy, madaniy va diniy yaqinlikni ta’kidlab, siyosiy va iqtisodiy hamkorlikni yanada kengaytirish niyatini bildirdi.
Muzokaralarda mehnat migratsiyasi sohasidagi hamkorlik uzoq muddatli istiqbolga ega ekani qayd etildi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
