AQSH prezidenti Donald Tramp mamlakat fuqarolari uchun yangi moliyaviy tashabbusni e’lon qildi. Uning so‘zlariga ko‘ra, bojxona tariflaridan yig‘iladigan daromadlar hisobidan har bir amerikalik fuqaroga kamida 2000 dollar to‘lov amalga oshiriladi. Bu haqda Tramp Truth Social ijtimoiy tarmog‘ida ma’lum qildi.
Prezident ta’kidlashicha, to‘lovlar yuqori daromadli shaxslarni istisno qilgan holda barcha amerikaliklarga beriladi. Shu bilan birga, u tarif siyosatini tanqid qiluvchilarni “ahmoqlar” deb atab, bojxona daromadlari orqali mamlakat davlat qarzini qisqa muddatda yopish mumkinligini qayd etdi.
Trampning fikricha, Qo‘shma Shtatlar tariflar orqali trillionlab dollar daromad olishi mumkin va bu AQSH iqtisodiyotini “yangi bosqichga olib chiqadi”.
Eslatib o‘tamiz, 2025 yil aprelda Tramp bir qator davlatlar uchun yangi tariflar joriy etish rejasini ma’lum qilgan edi. Uning ta’kidlashicha, bu chora AQSH manfaatlarini himoya qilish hamda mamlakatni yillar davomidagi iqtisodiy bosimdan xalos etishga qaratilgan.
“Zamin”ni Telegramʻda oʻqing!
