Namanganlik fuqaro qarz undirish uchun jinoiy guruh tuzganlikda gumonlanmoqda Video

Huquq-tartibot idoralari tovlamachilik va zo‘ravonlik bilan shug‘ullangan jinoiy guruh faoliyatiga chek qo‘ydi. Tergov taxminiga ko‘ra, guruhni Namangan shahrida yashovchi, avval ham bir necha bor sudlangan shaxs tashkil etgan. Bu haqda podrobno.uz xabar beradi.

IIV matbuot xizmati ma’lumotiga ko‘ra, 27 yoshli gumonlanuvchi Bahriddin Nasriddinov (laqabi — Eshon) ilgari firibgarlik, bezorilik va hujjatlarni qalbakilashtirish bilan bog‘liq jinoyatlar uchun sudlangan. Tergov versiyasiga ko‘ra, u pul mojarolarini kuch ishlatib “hal qilish” va qarzlarni undirish bilan shug‘ullanuvchi uyushgan guruh tuzgan.

Holatlardan birida guruh a’zolari tanishini kaltaklab, tanasiga pichoq bilan jarohatlar yetkazgani aytilmoqda. Mazkur epizod yuzasidan bezorilik moddasi bilan jinoyat ishi qo‘zg‘atilgan. Ushbu modda 5 yilgacha ozodlikdan mahrum etish jazosini nazarda tutadi.

IIV ushbu guruh xatti-harakatlaridan jabrlangan bo‘lishi mumkin bo‘lgan fuqarolarni 102 raqamiga qo‘ng‘iroq qilish yoki eng yaqin ichki ishlar bo‘limiga murojaat etishga chaqirdi.

Avvalroq Andijonda IIV va DXX xodimlari o‘zini huquq-tartibot idoralari vakili sifatida ko‘rsatib, qurol va o‘tkir buyumlar bilan tahdid qilgan holda fuqarolardan kriptovalyuta hamda mulkni tovlamachilik yo‘li bilan talab qilgan guruh faoliyatini to‘xtatgani xabar qilingandi. Ish bo‘yicha ikki gumonlanuvchi mamlakatdan chiqib ketgani va qidiruvga berilgani aytilgan.