Bolgariyada mamlakat tarixida ilk marta davlat rahbari vakolatlari ayol siyosatchiga o'tdi. 2026 yil 23 yanvar, juma kuni Konstitutsiyaviy sud Rumen Radevning iste'fosini rasman tasdiqladi va shundan so'ng prezidentlik vakolatlari avtomatik tarzda vitse-prezident Iliyana Yotovaga o'tdi. Bu haqda podrobno.uz xabar beradi.
Konstitutsiyaga ko'ra, Yotova amaldagi muddat yakuniga qadar — 2027 yil yanvarigacha — davlat rahbari vazifasini bajaradi. Sud Radev vakolatlarining muddatidan oldin tugatilishini uning ixtiyoriy arizasiga asosan bir ovozdan ma'qulladi.
2017 yildan beri prezident bo'lib kelgan, avval Harbiy-havo kuchlari qo'mondoni bo'lgan Radev zamonaviy demokratik davrda muddat tugashidan oldin o'z xohishi bilan iste'foga chiqqan ilk prezident bo'ldi. U qarorini siyosiy jarayonlarda faolroq ishtirok etish va kutilayotgan muddatidan oldingi parlament saylovlariga tayyorgarlik ko'rish istagi bilan izohladi.
61 yoshli Iliyana Yotova prezidentlik vakolatlarini qabul qilarkan, qayta qasamyod keltirishiga hojat yo'q: u 2022 yilda vitse-prezident sifatida ikkinchi muddatga kirishayotganda qasamyod qilgan. Xayrlashuv murojaatida Radev Yotovani “munosib o'rinbosar” deb atab, siyosiy inqiroz sharoitida institutlar barqarorligini ta'minlay olishiga ishonch bildirdi.
Yotova siyosiy hamda xalqaro maydonda katta tajribaga ega. U prezident ma'muriyatiga kelishidan oldin telejurnalist bo'lib ishlagan, Bolgariya sotsialistik partiyasi matbuot markazini boshqargan, keyin milliy parlament va Yevroparlament deputati bo'lgan.
Yevropadagi faoliyati davomida u terrorizmga qarshi kurash, shaxsiy ma'lumotlarni himoya qilish hamda Bolgariyaning Shengen hududiga qo'shilishi masalalari bilan shug'ullangan. Yangi lavozimda esa Yotova xalqaro maydonda mamlakatni vakillash bilan birga parlament fraksiyalari bilan maslahatlashuvlar o'tkazib, so'nggi besh yil ichidagi sakkizinchi parlament saylovlari sanasini belgilash jarayonini ham boshqarishi kutilmoqda.
“Zamin”ni Telegramʻda oʻqing!
