AQSH prezidenti Donald Tramp mamlakat atrofidagi keskin xalqaro vaziyat fonida Eron bilan olib borilayotgan muloqotlar ijobiy ruhda kechayotganini ma’lum qildi.
Prezident bu haqda Vashington shahrida bo‘lib o‘tgan G‘azo bo‘yicha tinchlik tashabbuslariga bag‘ishlangan yig‘ilishda so‘z yuritib, AQSH nomidan muzokaralar olib borayotgan maxsus vakil Stiv Uitkoff hamda diplomatik jarayonlarga jalb etilgan Jared Kushner faoliyatini alohida ta’kidladi.
Donald Trampning aytishicha, amerikalik muzokarachilar so‘nggi kunlarda qator muhim va mazmunli uchrashuvlar o‘tkazgan.
— Hozirgi paytda Eron juda sezgir va murakkab nuqta hisoblanadi. Shu bilan birga, vakillarimiz u yerdagi tomonlar bilan doimiy aloqada bo‘lib turibdi. Uchrashuvlar samarali o‘tmoqda, munosabatlar ishchan ruhda saqlanyapti va eng muhimi, yaxshi muzokaralar ketmoqda, — dedi AQSH rahbari.
Shuningdek, Tramp so‘nggi yillar tajribasi shuni ko‘rsatganini qayd etdiki, Eron bilan chuqur va mazmunli kelishuvlarga erishish oson emas. Uning so‘zlariga ko‘ra, mavjud siyosiy ziddiyatlar va mintaqadagi beqarorlik muzokara jarayonini yanada murakkablashtiradi.
Biroq Oq uy rahbariga ko‘ra, ayni paytda tomonlar o‘rtasida muloqot uzilmagani va ishonchni tiklashga qaratilgan harakatlar davom etayotgani muhim ahamiyatga ega. AQSH ma’muriyati Eron bilan bog‘liq masalalarda diplomatik yechimlarga ustuvor ahamiyat berish niyatida ekanini ham ta’kidlab o‘tdi.
“Zamin”ni Telegramʻda oʻqing!
