Yevropa Ittifoqi mamlakatlari AQSH prezidenti Donald Trampning chaqiriqlariga qaramay, Hormuz bo'g'oziga dengiz kuchlarini yuborishni rejalashtirmayapti, dedi YIning tashqi siyosat bo'yicha rahbari Kaja Kallas 16 mart kuni YI tashqi ishlar vazirlari yig'ilishidan so'ng. Bu haqda Tengrinews.kz xabar beradi.
Kallasning aytishicha, blok Yaqin Sharqdagi mojaroga bevosita aralashishni istamaydi. Uning so'zlariga ko'ra, YIga a'zo davlatlar hozirda Qizil dengizda kemachilikni himoya qilishga qaratilgan Aspides missiyasi mandatini Hormuz bo'g'ozini ham qamrab oladigan tarzda kengaytirishga tayyor bo'lmagan.
“Bu Yevropaning urushi emas,” dedi Kallas va hech kim jangovar harakatlarga yanada chuqurroq tortilishni istamasligini hamda ko'plab hukumatlar mojaro qayerga olib borishidan xavotirda ekanini qo'shimcha qildi. Shu bilan birga, u Qizil dengiz global savdo uchun hanuz muhim ekanini va u hali ham jiddiy e'tibor talab qilishini ta'kidladi.
U, shuningdek, husiylar tomonidan aralashuv xavfi hanuz real ekanidan ogohlantirdi, bu esa Yevropa mamlakatlari hushyor bo'lib qolishi kerakligini anglatadi. O'tgan hafta Tramp Fransiya, Germaniya, Buyuk Britaniya, Xitoy, Yaponiya va Janubiy Koreya kabi bir qator davlatlarni Hormuz bo'g'ozida xavfsiz qatnovni tiklashga ko'maklashish uchun harbiy kemalar yuborishga chaqirdi. Germaniya esa mintaqadagi harbiy missiyada Bundesver ishtirokini allaqachon rad etgan edi.
“Zamin”ni Telegramʻda oʻqing!
