Foto: Xinhua News
Xalqaro siyosiy jarayonlarda AQSH va Eron o‘rtasidagi muzokaralar yana-da murakkablashib, “boshi berk ko‘cha”ga kirib qolgani haqida Financial Times xabar bermoqda. Bunga asosiy sabab sifatida Xo‘rmuz bo‘g‘ozi atrofidagi nazorat masalasi ko‘rsatilmoqda.
Manbalarga ko‘ra, Pokistonda o‘tkazilgan AQSH–Eron muzokaralarida aynan ushbu strategik yo‘lak bo‘yicha kelishmovchilik saqlanib qolmoqda. Tehron tomoni bo‘g‘oz ustidan to‘liq nazoratni o‘z qo‘lida saqlash va undan o‘tadigan kemalardan to‘lov undirish niyatida ekanini bildirgan. Shu bilan birga, Eron taraf Ho‘rmuzni birgalikda boshqarish haqidagi taklifni qatʼiy rad etmoqda.
Maʼlumotlarga ko‘ra, 11 aprel kuni Islomobodda AQSH va Eron delegatsiyalari o‘rtasida uchrashuv bo‘lib o‘tgan. Amerika tomonidan muzokaralarda vitse-prezident Jey Di Vens, maxsus vakil Stiv Uitkoff hamda Donald Trampning kuyovi Jared Kushner ishtirok etgan. Eron delegatsiyasi esa parlament raisi Muhammad Boqir G‘olibof va tashqi ishlar vaziri Abbos Aroqchi bilan namoyon bo‘lgan.
Xabarlarda aytilishicha, Vashington va Tehron o‘rtasida muzokaralar uchun vaziyatni yumshatish maqsadida vaqtinchalik o‘t ochishni to‘xtatish bo‘yicha kelishuvga ham erishilgan. Shu bilan birga, Eron tomonidan taqdim etilgan o‘n bandli takliflar paketi kelgusidagi ehtimoliy kelishuvlar uchun asos sifatida ko‘rib chiqilishi mumkin.
Hozircha esa Ho‘rmuz bo‘g‘ozi atrofidagi bahs muzokaralar yo‘lini yana-da qiyinlashtirib, tomonlar o‘rtasidagi kelishuvni kechiktirmoqda.
“Zamin”ni Telegramʻda oʻqing!
