Rossiya AZAL yo‘lovchi samolyoti halokati bo‘yicha tovon to‘lashga kelishdi
Ozarbayjon va Rossiya tashqi ishlar vazirliklari 2024-yil dekabr oyida yuz bergan AZAL samolyoti halokati bo‘yicha tovon to‘lovlari masalasida kelishuvga erishdi. Mazkur voqea natijasida 38 kishi halok bo‘lgan va Rossiya Prezidenti samolyot tasodifan urib tushirilganini tan olgan edi. Tomonlar kelishuv tafsilotlarini oshkor qilmagan bo‘lsalar-da, ushbu qadam ikki davlat o‘rtasidagi hamkorlikni mustahkamlashga xizmat qiladi.
Ozarbayjon va Rossiya tashqi ishlar vazirliklari qo‘shma bayonot berib, 2024 yil dekabr oyida yuz bergan AZAL yo‘lovchi samolyoti halokati yuzasidan asosiy masalalar bo‘yicha kelishuvga erishilganini ma’lum qildi.
Bayonotga ko‘ra, fojia oqibatlari, jumladan tovon to‘lovlari bilan bog‘liq masalalar ham tartibga solingan. Biroq tomonlar kelishuvning batafsil shartlarini ochiqlamagan.
Ikki davlat ushbu qarorni o‘zaro hamkorlik va ittifoqchilik aloqalarini yanada mustahkamlashga qaratilgan muhim qadam sifatida baholagan.
Eslatib o‘tamiz, 2024 yil 25 dekabr kuni Boku–Grozniy yo‘nalishida uchayotgan AZAL aviakompaniyasining Embraer E190 samolyoti Qozog‘istonning Oqtov shahri yaqinida halokatga uchragan. Hodisada 38 kishi halok bo‘lib, 29 yo‘lovchi omon qolgan edi.
Keyinchalik Rossiya prezidenti Vladimir Putin samolyot Rossiya havo mudofaasi tomonidan tasodifan urib tushirilganini tan olgan edi. Ushbu voqea ortidan Moskva va Boku o‘rtasidagi diplomatik munosabatlarda sovuqlik yuzaga kelgan.
Izohlar 0
…