Eron AQSH bilan sulhni uzaytirishni rad etib keskin ogohlantirdi
Eron AQSh bilan sulh bitimini uzaytirishni rad etib, keskin ogohlantirish berdi. Mamlakat o'zining milliy manfaatlari asosida bitim shartlariga rioya qilish yoki ularni bajarishni to'xtatish huquqiga ega ekanligini bildirdi. Eron, shuningdek, dengiz yo'llaridagi blokada davom etsa, buni dushmanlik harakati deb baholashini va zarur bo'lsa, kuch ishlatish yo'li bilan blokadani bekor qilish imkoniyatini istisno qilmasligini ma'lum qildi. Bu esa mintaqadagi keskinlikning yanada kuchayishi mumkinligi haqidagi xavotirlarni oshirmoqda.
Eron davlat televideniyesi xabariga ko‘ra, Tehron sulh bitimining uzaytirilishini tan olmasligini ma’lum qilgan. Rasmiy bayonotda qayd etilishicha, mamlakat o‘zining milliy manfaatlaridan kelib chiqib, sulh shartlariga rioya qilishi yoki uni bajarishni to‘xtatishi mumkin.
“Tasnim” axborot agentligi tarqatgan ma’lumotga ko‘ra, Eron Pokiston orqali AQSHga Islomobodda o‘tkazilishi mumkin bo‘lgan muzokaralarda ishtirok etmasligini rasman bildirgan. Shuningdek, Tehron tomonidan AQSHdan sulh muddatini uzaytirish bo‘yicha hech qanday so‘rov ham yo‘llanmagani ta’kidlangan.
Bayonotlarda dengiz yo‘llaridagi cheklovlar masalasiga ham to‘xtalib o‘tilgan. Eron tomoni dengiz blokadasining davom etishi dushmanona harakat sifatida baholanishini bildirgan. Agar vaziyat o‘zgarmasa, mamlakat Fors ko‘rfazidagi strategik ahamiyatga ega Hormuz bo‘g‘ozi orqali transport harakatini tiklamasligi mumkinligi aytilgan.
Shuningdek, rasmiylar zarurat tug‘ilganda blokadani kuch ishlatish yo‘li bilan bekor qilish ehtimoli ham istisno qilinmasligini qayd etgan. Bu esa mintaqadagi keskinlik yanada kuchayishi mumkinligi haqidagi xavotirlarni oshirmoqda.
Izohlar 0
…