Eron parlamenti rahbari Muhammad Boqir Qolibof AQSH bilan kechayotgan iqtisodiy raqobat va bosimlar masalasida keskin bayonot bilan chiqdi. Uning fikricha, AQSH Eronga qarshi sanksiyalar va iqtisodiy cheklovlar borasida asosiy “kartalari”ning katta qismini allaqachon ishlatib boʻlgan.
Qolibof oʻz munosabatini ijtimoiy tarmoq orqali bildirib, AQSH tomonidan namoyon etilayotgan ustunlikka shubha bilan qarash kerakligini taʼkidladi. Uning aytishicha, vaziyatga chuqur nazar tashlansa, taʼminot va talab imkoniyatlari oʻzaro muvozanatda ekani koʻrinib turibdi. Bu esa iqtisodiy kurashda bir tomonlama ustunlik yoʻqligini anglatadi.
«Ular oʻz ustunligi bilan maqtanishyapti. Keling, qarab chiqaylik: bu yerda taʼminot imkoniyatlari talab imkoniyatlariga teng», – deb yozdi Qolibof X tarmogʻida.
Siyosatchi Eronning hali toʻliq ishga solinmagan muhim strategik imkoniyatlariga ham toʻxtalib oʻtdi. U jumladan Hoʻrmuz boʻgʻozi, Bab-ul-Mandab boʻgʻozi kabi muhim geosiyosiy nuqtalarni, shuningdek neft quvurlari orqali taʼsir oʻtkazish imkoniyatlarini alohida qayd etdi. Bu omillar jahon energetika bozorida jiddiy taʼsir kuchiga ega ekani sir emas.
Shu bilan birga, AQSH tomoni ham qator iqtisodiy choralarni amalga oshirgan. Jumladan, strategik neft zaxiralarini bozorga chiqarish, talabni sunʼiy ravishda qisqartirish va narx siyosatini moslashtirish kabi mexanizmlar orqali vaziyatni nazorat qilishga harakat qilingan.
Qolibofning taʼkidlashicha, Eron hali barcha imkoniyatlarini ishga solmagan va bu kelgusidagi iqtisodiy qarama-qarshiliklarda muhim rol oʻynashi mumkin. Uning fikricha, AQSH esa aksincha, oʻz resurslarining maʼlum qismini allaqachon sarflab boʻlgan.
Shuningdek, u yaqin oylarda energiya resurslariga boʻlgan talab oshishini ham inobatga olish zarurligini urgʻuladi. Ayniqsa, yoz mavsumida isteʼmol hajmi ortishi AQSH uchun qoʻshimcha bosim omillaridan biriga aylanishi mumkin.
Qisqasi, bu bayonotlar global energetika va iqtisodiy raqobat yangi bosqichga oʻtayotganidan dalolat beradi. Endi eʼtibor — qaysi tomon oʻz imkoniyatlarini samaraliroq ishga sola oladi, shu yerda.
“Zamin”ni Telegramʻda oʻqing!
