Meksika ko‘chalaridan birida yuk mashinasi kuzovidan 9 nafar odamning jasadi topildi…

Voqea Meksikaning Gerrero shtatiga qarashli Chilpansingo shahar ko‘chasida sodir bo‘lgan. Huquqni muhofaza qilish tashkiloti xodimlari yo‘l chetiga qo‘yib ketilgan yuk mashinasini nazoratdan o‘tkazish jarayonida kuzovga 9 ta murda berkitilganiga guvoh bo‘lishdi. Taxminlarga ko‘ra, bu mashinadan qonunga zid maqsadlar yo‘lida foydalanilgan bo‘lishi mumkin. Demak, gap aylanib yana narkotik savdosiga taqaladi.

Politsiyachilarning gapiga qaraganda, yaqinda shu shaharda yashovchi 9 nafar odam bedarak yo‘qolgan. Ularning barchasi narkotik savdosiga aloqador ekani aniqlangan, deb yozmoqda Hordiq.uz sayti.

Shtat prokuraturasi ushbu fakt yuzasidan jinoiy ish qo‘zg‘atdi. Tergov harakatlari davom etmoqda.

Eslatib o‘tamiz, Meksikaning Gerrero mamlakatdagi shtati eng xavfli shtatlardan biri hisoblanadi. Shu hududda Amerikaga ulgurji tarzda jo‘natiladigan narkotik moddalarni nazorat qiluvchi ashaddiy kallakesarlar istiqomat qiladi. Achinarlisi, bu jinoyatlarga ko‘plab politsiyachilar ham sheriklik qiladi. Masalan, 2014 yil sentyabrida aynan shu shtatdan jami 43 nafar talaba o‘g‘irlab ketilgan. Keyin ma’lum bo‘ldiki, talabalarni politsiyachilar o‘g‘irlab, kallakesarlar qo‘liga topshirgan ekan.