Talaba qiz sotib olgan kiyilgan krossovka ichidan 1000 funt-sterling pul chiqdi

Voqea yaqinda Angliyaning Manchester shahrida sodir boʻldi. 19 yoshni qarshilagan talaba qiz Ella Gillman internet orqali kiyilgan krossovka sotib olgandi. Nimayam qilsin? Talabalik-da! Kiyilgan boʻlsa ham arzonga tushadi. Ella uyga kelgach, shosha-pisha krossovkalarni kiyib koʻrmoqchi boʻldi. Bir poyi hadeganda oyogʻiga sigʻa qolmadi. Qiz sezdiki, ichida nimadir bor. Qoʻli bilan oʻsha xalal bergan narsani chiqarib oldi. Konvert ekan. Ichini ochdi-yu, 1000 funt-sterling pul solinganiga guvoh boʻldi…

Xuddi shu mahal Manchesterdan 400 kilometr uzoqlikda joylashgan Brayton shahrida yashovchi Laura Xazeldayn ismli ayol alam oʻtida kuyib yonardi. Bir paytlar roʻzgʻorimning koriga yaraydi deb 1000 funt-sterling pul berkitgandi. Ammo shuncha eslashga urinmasin, qayerga berkitganini topa olmasdi. Darvoqe, internet savdo orqali Ella sotib olgan krossovkalar egasi ham xuddi shu Laura edi.

Qarang, halol ishlab topilgan pul egasidan boshqaga nasib qilmasligi yana bir karra isbotlandi. Ella oʻsha zahotiyoq Lauraning telefon raqamiga 1000 funt-sterling pul tashladi.

— Men hozirgi kunda shunday halol insonlar borligiga ishonmasdim, — deydi Laura hayajon aralash. — Qarang, yaxshi kunlar uchun deb yashirgan pullarimni butunligicha oʻzimga qaytarishdi. Men Elladan juda-juda minnatdorman. Xudoyimdan unga faqat yaxshiliklar tilayman!..

Aytgancha, azbaroyi xursand boʻlib ketgan Laura krossovka evaziga olgan pulni Ellaga pochta orqali qaytarib joʻnatdi. Yoniga yaxshigina chegirmalarga ega buyumlar kuponlarini ham qoʻshib qoʻydi.

Manba: [url=https://hordiq.uz/2018/09/24/angliyalik-talaba-qiz-... [/url] “Zamin” yangiliklarini “Telegram”da kuzatib boring