Mixail Saakashvili ochlikning 49-kunida hushidan ketdi

^{Foto: Global Look Press}
Gruziya qamoqxonasida ochlik e’lon qilgan mamlakat sobiq prezidenti Mixail Saakashvili advokati bilan uchrashuv vaqtida yiqilib tushib, hushidan ketdi. Bu haqda uning himoyachilaridan biri Beka Basilayga tayanib, Meduza xabar berdi.

Basilayning so‘zlariga ko‘ra, Saakashvili binodan advokatlari bilan uchrashuvga chiqayotganida qoqilib, yiqilib tushgan. Yiqilgach u ko‘zini ochmagan va hech narsani sezmagan. Saakashvilini «nosilka»da olib ketishgan.

Keyinroq Saakashvilini ko‘zdan kechirish uchun taklif qilingan reanimatolog Guliko Kiliftari «Rustavi 2» telekanaliga sobiq prezident qamoqxona shifoxonasining jonlantirish bo‘limida yotqizilganini ma’lum qilgan. Kiliftarining so‘zlariga ko‘ra, uning ahvolini barqarorlashtirishga muvaffaq bo‘lingan.

Avvalroq Saakashvilining shaxsiy shifokori Nikoloz Kipshidze Gruziya sobiq prezidentining ahvoli keskin yomonlashganini ma’lum qilgandi. Shifokorning so‘zlariga ko‘ra, organizmdagi endokrinologik va metabolik o‘zgarishlar natijasida yuzaga kelgan teri sarg‘ayishi avvalgi kunlarga nisbatan kuchaygan. Doktor Kipshidze yaqin kunlarda bu o‘zgarishlar tuzatib bo‘lmas holga kelishidan xavotirda edi.

Eslatib o‘tamiz, 1 oktabr kuni Mixail Saakashvili sakkiz yildan buyon birinchi marta Gruziyaga keldi. U chegarani noqonuniy kesib o‘tganlik ayblovi bilan qo‘lga olindi. Shundan keyin Gruziyada muxolifat norozilik namoyishlari boshlandi, ular Saakashvili ozod etilishini talab qildi. Rustavi shahridagi qamoqxonada saqlanayotgan sobiq prezident oktabr boshlarida ochlik e’lon qilgandi, 11 noyabr kuni esa u ochlikni to‘xtatgani ma’lum bo‘ldi.

Gruziya Adliya vazirligi sobiq prezidentni qamoqxona kasalxonasiga yotqizishni bir necha bor taklif qilgan, biroq Saakashvili va uning advokatlari bunga mutlaqo qarshi. Ular Gruziyaning sobiq rahbarini xususiy fuqarolik klinikasiga olib borishni talab qilmoqda. “Zamin” yangiliklarini “Youtube”da kuzatib boring