Mariupolda Ukrainaning 1026 nafar dengiz piyodasi taslim bo‘lgani ma’lum qilindi

^{Foto: Ruposters}
Rossiya Mudofaa vazirligi rasmiy vakili Igor Konashenkov Mariupolda «Ukraina 36-dengiz piyodalari brigadasining 1026 nafar harbiy xizmatchisi o‘z xohishiga ko‘ra qurollarini tashlab, taslim bo‘lgan»ini ma’lum qildi. Bu haqda u 13 aprel kuni ertalab o‘tkazilgan brifingda aytib o‘tgan.

Ta’kidlanishicha, taslim bo‘lgan harbiy xizmatchilarning 162 nafari ofitser.

«Ukraina 36-dengiz piyodalari brigadasining 151 nafar yaralangan harbiy xizmatchisiga joyida tibbiy yordam ko‘rsatilgan, shundan so‘ng ularning barchasi davolanishi uchun Mariupol shahar shifoxonasiga yetkazilgan», — deydi Konashenkov.

36-dengiz piyodalari brigadasining harbiy xizmatchilari taslim bo‘lgani to‘g‘risidagi xabarlar avvalroq rus Telegram kanallarida paydo bo‘lgandi. Shuningdek, 12 aprel kuni kechqurun Checheniston yetakchisi Ramzan Qodirov ham bu haqda ma’lum qilgan.

Shu bilan birga, Ukraina OAVlari 12 aprel kuni dengiz piyodalarining 36-maxsus brigadasi qurshovdan chiqib, «Azov» polka bilan birlashgani haqida yozgan edi.

11 aprel kuni Fecebook’da Ukraina Harbiy-dengiz kuchlari dengiz piyodalarining 36-maxsus brigadasiga o‘q-dorilar yetishmayotgani to‘g‘risida xabarlar tarqaldi. 10 aprel kuni «Azov» polkining Twitter’dagi sahifasida polk komandiri o‘rinbosari Svyatoslav Palamar bo‘linma bilan ikki haftadan beri Ukrainaning siyosiy rahbariyati bilan aloqa o‘rnata olmayotganini aytgan videosi paydo bo‘ldi.

12 aprel kuni Ukraina prezidenti ofisi rahbarining maslahatchisi Mixail Podolyak Mariupolda qolgan harbiylarga rostdan ham o‘q-dorilar yetishmayotganini yozdi. «Prezident va Qurolli kuchlar rahbariyati biror yechim topish va jangchilarimizga yordam berish uchun barcha imkoniyatlarni ishga solmoqda», — degan u. Rossiya va Ukraina urushi “Zamin” yangiliklarini “Twitter”da kuzatib boring