Qaysi biri foydaliroq: mayonez yoki ketchup?

^{Foto: iStock}
Ma'lumki, ozishni maqsad qilgan va parhezni boshlagan har bir odam ratsionida avvalo mayonez kabi yogʻli va kaloriyaga boy mahsulotni chiqarib tashlaydi. Ketchup esa souslar ichida kamroq kaloriyaga ega va foydaliroq tuyuladi. Aslida esa qanday?

Ketchup va mayonez nimadan tayyorlanadi?

Hozirgi kunda keng qoʻllaniladigan oʻzgartirilgan ketchup retsepti XX asrning boshlarida Qoʻshma Shtatlarda natriy benzoat konservantidan foydalanish zarurati haqidagi munozara natijasida paydo boʻlgan. U oʻzida tomat pastasi yoki pyuresi, tabiiy pomidor, ziravorlar, oʻsimlik yogʻi va bir nechta turdagi xushboʻylantiruvchi moddalarni saqlashi mumkin.

Masalan, “ekstra” kategoriyasiga tegishli ketchup kamida 12% tomatli eruvchan quruq moddalar boʻladi va hech qanday boʻyoq qoʻshilmaydi. Birinchi va ikkinchi kategoriyaga tegishli ketchuplarda esa bu koʻrsatkich atigi 4-6 foizni tashkil etadi.

^{Foto: iStock}
Mayonez esa asosan tabiiy mahsulotlardan: oʻsimlik yogʻi, limon sharbati va tuxum sarigʻi hamda xantal kukunidan tayyorlanadi. Ularning har biri oʻziga xos foydali xususiyatlarga ega. Oʻsimlik yogʻlarida esa toʻyinmagan kislotalar ham mavjud. Ketchupdan farqli ravishda mayonezlar hech qanday kategoriya va turlarga ajratilmaydi, faqatgina qoʻshimchalar bilan ajralib turishi mumkin.

Sanoat usulida tayyorlangan mayonez uch kundan ortiq saqlanishi mumkin. Vakuum ostida qadoqlash, mahkamlash kabi maxsus usullar saqlash muddatini oshirishga yordam beradi. Buning uchun konservantlar, quyuqlashtiruvchi moddalar, stabilizatorlar va boʻyoqlar qoʻllaniladi.

Ketchup va mayonezning energetik qiymati

^{Foto: iStock}
Mayonezdagi kaloriyalar miqdori ketchupdan olti baravar koʻp. Mayonez yogʻli sous hisoblanib, undagi makronutrientlar zararli emas va me'yorda iste'mol qilinganda sogʻliq uchun foydalidir.

Agar kuniga oʻrtacha 2500 kilokaloriya miqdorida taom esak, undan 750 kilokaloriyasi yogʻlardan iborat boʻladi. Bu 83 gramm yogʻ demakdir. Bir osh qoshiq mayonezda esa taxminan 10 gramm yogʻ mavjud.

Ketchupda deyarli yogʻ yoʻq. Ammo u oʻzida juda koʻp shakarni saqlaydi. 100 gramm ketchup ichida oʻrtacha 21 gramm shakar boʻladi. Shakar esa zararli mahsulotlar roʻyxatida turadi.

Qaysi sous foydaliroq? Ketchupmi yoki mayonez?

Souslardan birini mutlaqo foydali, ikkinchisi esa zararli deb aytib boʻlmaydi. Ikkisi ham iste'mol miqdoriga qarab turli ta'sirga ega boʻlishi mumkin. Agar kundalik ratsionda yogʻlar miqdori koʻp boʻlsa, mayonezni kamroq, shakar miqdori koʻp boʻlsa, ketchupni kamroq egan ma'qul. Ortiqcha vazndan xalos boʻlish uchun parhez tutayotgan shaxslar esa umuman souslarni iste'mol qilmagani yaxshi. “Zamin” yangiliklarini “Telegram”da kuzatib boring