Tadqiqot: ayollar erkaklarga qaraganda koʻproq uxlashi kerak

Ayollarga erkaklarga qaraganda oʻrtacha 20 daqiqa koʻproq uyqu kerak. Bu haqda Lafboro universiteti olimlari tomonidan oʻtkazilgan tadqiqotga tayanib, CBS News xabar berdi.

Universitet professori Jim Xornning soʻzlariga koʻra, “ayol miyasi” erkak miyasidan biroz boshqacha tuzilgan. Xususan, ayollar bir vaqtning oʻzida bir nechta ishlarni bajarishga odatlangan — shuning uchun ularning miyasi erkaklarnikiga qaraganda tezroq ishlaydi.

Tadqiqot doirasida mutaxassislar Buyuk Britaniyaning 200 dan ortiq aholisi xulq-atvorini oʻrganib chiqdi. Natijada erkaklar kuniga oʻrtacha olti soat uxlashi kerak, degan xulosaga kelindi. Ayollarga esa 20 daqiqa koʻproq uyqu zarur. Bundan tashqari, uyqu etishmasligi ayollarga kuchliroq ta'sir koʻrsatadi: ular jizzaki boʻlib qoladi, tez-tez stress yoki tushkunlikka tushishi mumkin.

Bu ayol miyasining erkak miyasidan tezroq ishlashini isbotlovchi yagona tadqiqot emas. Minneapolisdagi Faxriylar tibbiyot markazi shifokori ayollar haqiqatan ham ma'lumotni erkaklarga qaraganda taxminan besh barobar tezroq qayta ishlashini ta'kidlagandi. Shuningdek, ayol miyasi oʻz resurslarining kamroq qismini ishlatadi.

Avvalroq amerikalik olimlar kechasi qoʻshimcha 46 daqiqa uxlash insonning stressga bardoshini oshirishi va umumiy sogʻligʻini yaxshilashini aniqlagan. “Zamin” yangiliklarini “Telegram”da kuzatib boring