Muchalingiz taqdiringizni belgilaydimi? Tug‘ilgan yilga qarab xarakterni aniqlang!

Qadimiy sharq falsafasi va muchallar tizimi inson fe’l-atvori, ichki dunyosi, hatto taqdir yo‘lini aniqlashda muhim manba hisoblanadi. Bugungi maqolamizda siz tug‘ilgan yilingizga qarab xarakteringiz, hayotga munosabatingiz va hatto kasbiy yo‘nalishingiz haqida qiziqarli ma’lumotlarga ega bo‘lasiz. Balki o‘zingizni yangidan kashf qilarsiz?

Sichqon (1924, 1936, 1948, 1960, 1972, 1984, 1996, 2008)

Doim harakatda, ishchan, quvnoq va pishiq. Tashqi ko‘rinishda bardam, ichki olamida sezgir va hissiyotga beriluvchan. Ular uchun eng muhim masala – barqarorlik va oilaviy farovonlik. Tashvishlarga ko‘p beriladilar, lekin kichik yutuqlardan ham quvonishni biladilar.

Ho‘kiz (1925, 1937, 1949, 1961, 1973, 1985, 1997, 2009)

Vazmin, o‘z fikrida sobit va matonatli. Ishga jiddiy yondashadi, bir necha vazifani birdan uddalay oladi. Biroq o‘ziga yoqqan ishdagina porlaydi. Ular uchun hayot – zavqlanish, shijoat va mustahkam qadriyatlar uyg‘unligidir.

Yo‘lbars (1926, 1938, 1950, 1962, 1974, 1986, 1998, 2010)

O‘ziga xos, kuchli, jiddiy va qat’iy pozitsiyali inson. Har bir qarorni chuqur tahlil qilib, shoshilmasdan qabul qiladi. Yolg‘izlikni hush ko‘radi, biroq bu uni sovuqqon qilmaydi. Ichki kuchi va g‘ayrati bilan boshqalarni ilhomlantiradi.

Quyon (1927, 1939, 1951, 1963, 1975, 1987, 1999, 2011)

Mehnatkash, qat’iyatli, ammo ba’zida serjahl va murosasiz. Harakatlariga ishonadi, lekin ko‘p hollarda mojaroga aralashib qolishi mumkin. Ishonch bildirilsagina porlaydi. Ko‘p sohalarda muvaffaqiyatli faoliyat yuritish qobiliyatiga ega.

Ajdaho (1928, 1940, 1952, 1964, 1976, 1988, 2000, 2012)

Rejachi, ehtiyotkor, harakatdan oldin har tomonlama o‘ylovchi inson. Juda puxta va mukammal ishlaydi. Maqtovga uchmaydi, lekin o‘zining harakatiga ishonadi. Muvaffaqiyatga olib boruvchi yo‘lni izlab topadi va ishonch bilan harakat qiladi.

Ilon (1929, 1941, 1953, 1965, 1977, 1989, 2001, 2013)

Zukko, hushyor, har bir imkoniyatni nazoratda tutadi. Tushuncha va diqqatga boy. Ichki energiyasi kuchli, hissiyotga berilmaydigan aqlli inson. Ayollari jozibali, erkaklari esa o‘z sohasining ustasi bo‘lishga intiladi.

Ot (1930, 1942,1954, 1966, 1978, 1990, 2002, 2014)

Hushfe’l, ochiqko‘ngil, do‘stona munosabatni qadrlovchi shaxs. Hayotda adolatparvarlik va halollikni birinchi o‘ringa qo‘yadi. O‘z sha’nini pastlatmaydi, har qanday qiyinchilikni yengib o‘tishga tayyor. Tashabbuskor va ijodkor.

Qo‘y (1931, 1943, 1955, 1967, 1979, 1991, 2003, 2015)

Tinchliksevar, sabrli va vafodor. O‘z fikrini dadil bildiradi, lekin yomonlikka yomonlik bilan javob qaytarmaydi. Har qanday ishda professional bo‘lishga harakat qiladi. Rahbarlik unga yoqadi, lekin yuragi hali ham iliq.

Maymun (1932, 1944, 1956, 1968, 1980, 1992, 2004, 2016)

Qiziquvchan, aql-idrokli va ixtirochi. Tezda muhitga moslashadi, ammo zerikishga moyil. Boshqalarning kayfiyatini darhol sezadi. Ilm-fan, ijod, san’at va pedagogika sohalarida muvaffaqiyatga erishadi.

Xo‘roz (1933, 1945, 1957, 1969, 1981, 1993, 2005, 2017)

Ishonuvchan, faollikni sevuvchi va tashqi ko‘rinishga e’tiborli. Ular doimo markazda bo‘lishga intiladi. Har bir harakatida ilhom kerak. Har qanday sohada muvaffaqiyatga erishishi mumkin – faqatgina boshlagan ishini yakunlay olishi lozim.

It (1934, 1946, 1958, 1970, 1982, 1994, 2006, 2018)

Sodiq, xushmuomala va ijtimoiy shaxs. Har qanday davrada o‘z o‘rnini topadi. Ayollari uy bekasi sifatida namunali, erkaklari esa oilaparvar va halol. To‘g‘rilikni qadrlaydi, lekin kuch ishlatishdan tiyilmaydi. Samimiy do‘stlikni bir umr saqlaydi.

To‘ng‘iz (1935, 1947, 1959, 1971, 1983, 1995, 2007, 2019)

Tadbirkorlik iste’dodiga ega, yuristlikdan tortib jurnalistikagacha – har sohada o‘zini ko‘rsatadi. Pulni yaxshi boshqaradi, yangilik yaratishga intiladi. Tashkiliy qobiliyat kuchli, lekin hissiy jihatdan chuqur emas. Nazoratni yaxshi ko‘radi.

Tug‘ilgan yilingiz – siz haqingizdagi eng qadimiy kalitlardan biri. Muchal ilmi shunchaki rivoyat emas, balki qadim o‘tmishdan kelayotgan insoniyat hikmati. Balki siz ham bu satrlar orqali o‘zingizni biroz bo‘lsa-da, yangidan kashf qildingiz? “Zamin”ni Telegramʻda oʻqing!