Internetda so‘nggi paytlarda keng muhokama qilinayotgan yangi tushuncha — phubbing. Bu holat muloqot vaqtida insonning diqqatini sherigidan ko‘ra telefoniga qaratishi bilan izohlanadi. Mutaxassislarning ta’kidlashicha, bu odat munosabatlarga katta zarar yetkazadi va ko‘plab nizolarni keltirib chiqaradi, deb yozadi Peopletalk nashri.
O‘tkazilgan tadqiqotda har kuni telefon ishlatadigan 196 nafar katta yoshli juftlik qatnashdi. Olimlar gadjetlardan foydalanish ularning munosabatlariga qanday ta’sir qilishini o‘rgandi va jonli suhbat o‘rniga telefonni tanlash holatlarini qayd etdi.
Natijalar kutilganidan ham salbiy bo‘ldi. Phubbing qurboni bo‘lgan insonlar tez-tez salbiy kayfiyatga tushgani, munosabatlardan qoniqish darajasi esa ancha pasaygani aniqlandi. Xususan, xavotirli bog‘lanish turiga ega respondentlar bu holatni yanada og‘irroq boshdan kechirishgan. Shu bilan birga, tajriba ishtirokchilarida o‘zini qadrlash pasayib, ruhiy tushkunlik belgilari kuchaygani kuzatildi.
Mutaxassislarning fikricha, smartfonlar hayotimizning ajralmas qismiga aylangan bo‘lsa-da, ulardan haddan tashqari foydalanish hissiy aloqalarni zaiflashtiradi. Natijada, telefonlar jonli muloqotni siqib chiqarib, sheriklar o‘rtasidagi ishonch va yaqinlikni izdan chiqarishi mumkin.
“Zamin”ni Telegramʻda oʻqing!
