Olimlar olib borgan yangi tadqiqot natijalari musiqa tinglash insonda yolg‘izlikni yengillashtirishi va ijobiy ijtimoiy tasavvurlarni uyg‘otishini ko‘rsatdi. Bu haqida Pravilamag nashri yozmoqda.
COVID-19 pandemiyasi davrida qo‘shiqlar inson hayotida muloqot o‘rnini qisman to‘ldirishi mumkinligi haqidagi fikr keng tarqalgan edi. O‘sha paytda ko‘plab odamlar musiqani “hamroh” sifatida tinglaganini va u orqali yolg‘izlik hissini kamaytirganini bildirgan.
Sidney Musiqa konservatoriyasi huzuridagi "Musiqa, ong va tana" laboratoriyasi rahbari, Horizon dasturi tadqiqotchisi Steffen A. Xerff boshchiligida o‘tkazilgan yangi ilmiy ishda musiqaning ijtimoiy mavzular bilan bog‘liq fantaziyalarni kuchaytirishi aniqlandi. Uning ta’kidlashicha:
— “Odamlar musiqani ko‘pincha o‘zlariga hamroh bo‘lishi uchun tinglashlarini aytishgan. Lekin bu shunchaki ifodaviy gapmi yoki musiqaning ijtimoiy tafakkurga haqiqiy ta’siri bormi — shu paytgacha aniq bo‘lmagan edi”.
Tadqiqotda 600 nafar ko‘ngilli qatnashdi. Ular yolg‘iz qolgan odam haqidagi videoni tomosha qilib, hikoyani davom ettirishlari kerak edi. Ishtirokchilarning bir qismiga turli tillardagi qo‘shiqlar yoki instrumental musiqa tinglash taklif etildi, qolganlari esa sukutda o‘z tasavvurlarini yaratdi.
Natijalar shuni ko‘rsatdiki, musiqa tinglaganlar sukutdagilarga qaraganda ancha yorqin, iliq va ijobiy fantaziyalar yaratgan. Ularning hikoyalarida “xalq”, “do‘st”, “birga”, “qishloq” kabi ijtimoiy mazmundagi tushunchalar tez-tez uchradi.
Xerffning qo‘shimcha qilishicha, qo‘shiq matnini tushunmaslik ham bu jarayonga to‘sqinlik qilmaydi. Hatto musiqada so‘zlar bo‘lmasa ham, u ijtimoiy xayolotni faollashtira oladi. Demak, bu jarayon faqat inson ovozini eshitish bilan bog‘liq emas.
“Zamin”ni Telegramʻda oʻqing!
