Erkaklar ayollarga nisbatan tezroq qarishi ilmiy jihatdan tasdiqlandi, deb xabar berdi pnas.org.
Proceedings of the National Academy of Sciences jurnalida chop etilgan so‘nggi tadqiqot natijalariga ko‘ra, erkaklar yosh o‘tishi bilan miya hajmini tezroq yo‘qotadi. Miyadagi ko‘plab sohalarda hujayralar faoliyati pasayishi ularda qarish jarayonini tezlashtiradi.
Tadqiqot doirasida mutaxassislar 4726 nafar insonning 12,5 mingdan ortiq magnit-rezonans tomografiya (MRT) suratlarini tahlil qildi. Har bir ishtirokchida o‘rtacha uch yillik oraliq bilan kamida ikkita tasvir o‘lchandi.
Natijalar shundan dalolat berdiki, erkaklarda miya hajmi ayollarga nisbatan ko‘proq qisqargan. Xususan, hissiyot va harakatlar uchun mas’ul bo‘lgan postmarkaziy po‘stloq qismida erkaklarda yiliga 2 foiz atrofida kamayish kuzatilgan. Ayollarda bu ko‘rsatkich 1,2 foizni tashkil etgan.
Olimlarning fikricha, bu holat erkaklarda qarish jarayonining tezroq kechishiga va umr davomiyligining qisqarishiga sabab bo‘ladi. Biroq shunga qaramay, ayollarda Alsgeymer kasalligi hali ham ikki baravar ko‘p uchraydi.
Yangi ilmiy ish esa bu holat keksalikning o‘zi bilan emas, balki boshqa biologik va genetik omillar bilan bog‘liq bo‘lishi mumkinligini ko‘rsatmoqda.
Tadqiqot mualliflari xulosa qildiki, miya hajmi qarish jarayonidagi eng aniq ko‘rsatkichlardan biri bo‘lib, inson hayoti tarzi, stress darajasi va uyqu sifatining ham katta ahamiyati bor.
“Zamin”ni Telegramʻda oʻqing!
