Uzoq vaqt bir joyda qimirlamay o‘tirish inson salomatligi uchun juda xavfli ekani yana bir bor isbotlandi. “JAMA Network Open” jurnalida chop etilgan yangi tadqiqotga ko‘ra, ish vaqtida uzoq o‘tirish barcha turdagi o‘lim xavfini, ayniqsa yurak-qon tomir kasalliklari bilan bog‘liq holatlarni sezilarli oshiradi, deb xabar berdi zamin.uz.
Taybey Tibbiyot universiteti olimlari 481 mingdan ortiq kattalar qatnashgan yirik kuzatuv o‘tkazdi. Ishtirokchilar qariyb 12 yil davomida tekshirilgan: ular sog‘liq tarixi, kundalik odatlari va olib borgan faoliyati haqida ma’lumot berib borgan.
Natijalar shundan dalolat berdiki, tadqiqotdagi odamlarning 60 foizi ish vaqtining asosiy qismini o‘tirib o‘tkazgan, 29 foizi o‘tirish va turishni almashtirib ishlagan, 10 foizi esa deyarli o‘tirmagan.
12 yil ichida 26 mingdan ortiq kishi vafot etgan va ularning yarmidan ko‘pi ko‘proq o‘tirgan guruhga to‘g‘ri kelgan. Bundan tashqari, uzoq o‘tiruvchilarda barcha sabablar bo‘yicha o‘lim xavfi 16 foiz, yurak-qon tomir kasalliklari bo‘yicha esa 34 foizga yuqori ekani aniqlangan.
Mutaxassislar ayniqsa yoshi 60 dan oshganlar, chekish odati borlar va surunkali kasalliklardan qiynalganlar uchun xavf yanada oshishiga e’tibor qaratgan.
Olimlar xulosa qilishiga ko‘ra, ish jarayonida o‘tirish va harakatni mos ravishda almashtirish, qisqa tanaffuslar qilish va kun davomida faollikni ko‘paytirish orqali ushbu jiddiy xavfni kamaytirish mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
