Anor yurak-qon tomir tizimi salomatligi uchun alohida ahamiyatga ega bo‘lgan mahsulot sifatida qayd etiladi. Uning tarkibida juda ulkan miqdorda uchraydigan V12 vitamini hisobiga qon bosimi me’yorda ushlanadi, qon-tomirlar devorlari yanada barqarorlashadi, eritrotsit hamda gemoglobin ishlab chiqarilishi faollashadi. Shu tufayli miya faoliyati, asab tizimi holati va umumiy fikrlash qobiliyatiga ijobiy ta’sir ko‘rsatadi.
Gemoglobin yetarli darajada bo‘lmaganda, miyaga kiradigan kislorod hajmi kamayadi. Bu esa surunkali charchoq, xotiraning pasayishi, diqqatni jamlashda qiyinchiliklar kabi belgilarga olib keladi. Anor esa aynan shunday mavsumda – kech kuzda yetiladi. Bu vaqtda organizm virus va turli kasalliklar ta’sirida bo‘ladi. Meva tarkibidagi S vitamini va meva kislotalari hujayralarni shikastlanishdan saqlaydi, immunoglobulinlar ishlab chiqarilishini faollashtiradi va immunitetni mustahkamlashda muhim rol o‘ynaydi. Shuningdek, anorning antibakterial va antiseptik xususiyatlari organizmni zararli bakteriyalardan himoya qilishga yordam beradi.
Anor sharbati ham benihoya foydali. U organizmda pH muvozanatini barqarorlashtiradi, yig‘ilib qolgan toksinlarni chiqarib yuborishga yordam beradi, samarali detoks jarayonini ta’minlaydi. Shu bilan birga, hazm tizimini yengillashtiradi, metabolizmni tezlashtiradi. Ushbu sharbatda limon, olma va oksalat kislotalarining ko‘pligi bunga asos bo‘ladi. Biroq oshqozoni hassos bo‘lgan kishilar uni qabul qilishdan oldin suv bilan birga aralashtirishi tavsiya etiladi — yuqori kislotalilik ba’zan qorin og‘rig‘iga sabab bo‘lishi mumkin.
Anor go‘zallik va yoshlikni saqlash borasida ham muhim o‘rin tutadi. S vitaminining serobligi, foydali antioksidant moddalarning ko‘pligi tufayli u zararli radikallar ta’sirini kamaytiradi, yallig‘lanish jarayonlarining oldini oladi. Shu orqali qarish jarayonini sekinlashtiradi, ajin tushishining oldini oladi, terini ultrabinafsha nurlaridan muhofaza qiladi.
Ya’ni, anor nafaqat mazali, balki har bir donasida inson organizmi uchun beqiyos quvvat va foydalar mujassam bo‘lgan meva hisoblanadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
