Yuqori daromadli aholi inflyatsiyani yuqori baholamoqda

O‘zbekiston Respublikasi Markaziy bankining 2025 yil aprel oyida o‘tkazgan so‘rovlari natijasida aholi inflyatsiya kutilmalari 14,2% darajasida saqlanib qolgan, deb Kursiv xabar berdi. Bu ko‘rsatkich 2024 yil dekabrdan beri eng past darajani tashkil etmoqda.

Respondentlar yoqilg‘i, transport va kommunal xizmatlar narxlarining sezilarli oshishini kutmoqda. Biroq, valyuta kursining katta o‘sishiga ishonuvchilar soni kamaygan.

Eng yuqori inflyatsiya kutilmalari Toshkent shahri (17,1%), Farg‘ona (16,1%) va Namangan (15,5%) viloyatlarida qayd etilgan. Eng past ko‘rsatkichlar Qashqadaryo (12%), Navoiy (12,3%) va Jizzax (12,9%) viloyatlarida kuzatilgan.

Daromadi 15 million so‘m va undan yuqori bo‘lgan fuqarolar inflyatsiyani o‘rtacha 18,5% deb baholagan. 10–15 million so‘m daromadlilar 17%, 7 million so‘m atrofidagi daromadlilar 16% inflyatsiyani kutmoqda. Eng past kutilmalar 2 million so‘m yoki undan kam daromadlilar orasida (12,6%) qayd etilgan.

Tadbirkorlar esa inflyatsiyani 12,8% deb baholagan (martda 13% edi). Ular kommunal xizmatlar, yoqilg‘i va soliq yuklamasi oshishidan xavotirda.

Sezilgan inflyatsiya darajasi 14,4% ni tashkil etgan. “Zamin”ni Telegramʻda oʻqing!