Polsha parlamenti (Seym) mamlakat kripto-bozorini Yevropa Ittifoqining MiCA (Markets in Crypto-Assets) qoidalari bilan uyg‘unlashtirishni nazarda tutuvchi qonun loyihasini ma’qulladi. 241 nafar deputat yoqlab, 200 nafari qarshi ovoz bergan ushbu hujjat prezident Karol Nawrocki tomonidan avvalroq ikki marta rad etilgan urinishlardan so‘ng qabul qilindi. Bu haqda Cointelegraph.com xabar beradi.
Moliya vazirligi tomonidan qo‘llab-quvvatlangan 2529-sonli qonun loyihasi Polsha Moliya nazorati boshqarmasiga (KNF) bozor ishtirokchilari ustidan nazorat o‘rnatish, ma’muriy sanksiyalar qo‘llash hamda shubhali hisob raqamlar va tranzaksiyalarni vaqtincha bloklash vakolatlarini beradi. Hujjat bir necha muqobil takliflar, jumladan, prezident va muxolifat partiyalari tomonidan taqdim etilgan loyihalar orasidan tanlab olindi.
Bozor ekspertlari va kripto-hamjamiyat vakillari qonunning ayrim qoidalari, xususan, sud nazoratisiz hisob raqamlarini bloklash vakolatlari borasida xavotir bildirmoqda. Tanqidchilarning fikricha, prezident bu safar ham qonunni veto qilishi mumkin, chunki nazorat organlarining vakolatlari bo‘yicha kelishmovchiliklar to‘liq bartaraf etilmagan.
Qonunchilikdagi noaniqliklar Polsha uchun Yevropa Ittifoqining iyul oyidagi MiCA reglamentini joriy etish muddatlari yaqinlashayotgan bir paytda jiddiy muammoga aylanmoqda. Vaziyat Zondacrypto platformasi atrofidagi firibgarlik mojarosi va foydalanuvchilarning mablag‘larini yechib olishdagi qiyinchiliklar fonida yanada keskinlashgan.
“Zamin”ni Telegramʻda oʻqing!
