Markaziy bank: Yirik banknotalarning chiqarilishi inflyasiya darajasi va narxlar barqarorligiga ta’sir ko‘rsatmaydi

Avvalroq, O‘zbekiston Respublikasida 22 avgustdan qiymati 50 000 so‘mga teng banknota muomalaga chiqarilishi haqida xabar bergan edik. Bu xabar tarqalganidan so‘ng, turli shov-shuvlarga sabab bo‘ldi.”Bu inflyasiyani yuzaga keltiradi” degan fikrlar ham bo‘ldi.

O‘zbekiston Respublikasi Markaziy banki ana shunday gap-so‘zlarga chek qo‘yish maqsadida 50 000 so‘m qiymatdagi banknotani muomalaga chiqarilishi bo‘yicha sharh berdi.

Unga ko‘ra, so‘nggi yillarda o‘rtacha ish haqi miqdorining oshib borishi hamda aholiga ish haqi, pensiya va nafaqalarni to‘lashda, shuningdek, naqd puldagi hisob-kitoblarni amalga oshirishda qulayliklar yaratish maqsadida 50 000 so‘mlik banknotalar muomalaga kiritilmoqda.

“Shuni alohida qayd etish lozimki, muomalaga yirik banknotlarning chiqarilishi iqtisodiyotdagi pul massasining o‘zgarishiga olib kelmaydi hamda inflyasiya darajasi va narxlar barqarorligiga ta’sir ko‘rsatmaydi”, deyiladi Markaziy bank xabarida.

50 000 so‘mlik pul birligini joriy etish naqd puldagi hisob-kitoblarni ixchamlashtirish, naqd pulni tashish, etkazish va saqlash bilan bog‘liq harajatlar va noqulayliklarni kamaytirishga, bankomatlar orqali aholiga xizmat ko‘rsatish ko‘lamini kengaytirishga imkoniyat yaratadi.


Manba: Qalampir.uz “Zamin” yangiliklarini “Telegram”da kuzatib boring