O‘zbekistonda qovunning faqat issiqxonada yetishtiriladigan «Zarhal» navi yaratildi

^{Foto: Qishloq xo‘jaligi vazirligi}
O‘zbekiston Qishloq xo‘jaligi vazirligi huzuridagi Sabzavot, poliz ekinlari va kartoshkachilik ilmiy-tadqiqot institutining Yekaterina Lyan boshchiligidagi seleksioner olimlari yangi qovun navini ixtiro qildi.

Qishloq xo‘jaligi vazirligi tomonidan e’lon qilingan xabarda aytilishicha, «Zarhal» nomi berilgan ushbu duragay faqat issiqxonada yetishtiriladi.

Bildirilishicha, «Zarhal»ni o‘ta ertapishar qovun toifasiga kiritish mumkin. U 72-78 kun davomida o‘sadi, palagi baquvvat, sershox. Bargi keng, qalin, to‘q yashil rangli, qirqimlidir.

Qayd etilishicha, qovunning hosili sharsimon, o‘rtacha kattalikda bo‘lib, og‘irligi atigi 0,8-1,5 kilogramm keladi. Yuzasi esa tekis, sariq rangda. Ustida yashil rangli chiziqlar tortilgan. Ichki qismi oqish, xushbo‘y hidli.

«Zarhal»ning tarkibidagi quruq modda miqdori 13,5-14,5 foizni tashkil etsa, qand miqdori 12-13 foizdan iborat.

^{Foto: Qishloq xo‘jaligi vazirligi}
Hosildorligi 8-8,5 kg/m2 ga teng bo‘lgan ushbu qovun navi un shudring va fuzarioz so‘lish kasalligiga chidamli ekani aytiladi. “Zamin”ni Telegramʻda oʻqing!