Toshkentda bolalarni muntazam qiynab kelgan shaxslar ushlandi

Sergeli tumanidagi xususiy uylardan birida yashovchi 37 yoshli O.A. va uning turmush o‘rtog‘i 35 yoshli M.A., tegishli ruxsatsiz 15 nafar voyaga yetmagan bolaga diniy adabiyotlardan foydalangan holda dars o‘tishgan. Voqea joyidan diniy adabiyotlar va mobil telefonlar topilib, ashyoviy dalil sifatida olingan.

Mazkur holat yuzasidan ushbu shaxslarga nisbatan MJtKning 241-moddasiga (Diniy ta’limotdan saboq berish tartibini buzish) asosan tegishli hujjatlar rasmiylashtirilgan.

Shuningdek, holatni o‘rganish jarayonida, bolalarga muntazam ravishda psixologik va jismoniy tazyiq o‘tkazilgani ma’lum bo‘lgan. Ularga nisbatan jismoniy kuch ishlatilgan.

Mazkur holat yuzasidan IIO xodimlari tomonidan tergovga qadar tekshiruv olib borilmoqda. Voyaga yetmagan bolalarga yetkazilgan tan jarohatlarining og‘irligini aniqlash maqsadida sud-tibbiy ekspertizasi tayinlangan.

Barcha holatlar aniqlanguniga qadar bolalar Toshkent shahar IIBBning Voyaga yetmaganlarga ijtimoiy-huquqiy yordam ko‘rsatish markaziga joylashtirilib, ularga psixologik va tibbiy yordam ko‘rsatilmoqda.