Toshkent tumanida ota aliment o‘rniga farzandlariga uy joy berdi

Majburiy ijro byurosining Toshkent tuman bo‘limi tomonidan moddiy yordamga muhtoj bo‘lgan voyaga yetmagan yoki mehnatga layoqatsiz shaxslar ta’minoti uchun aliment to‘lash majburiyatini ta’minlash, ijtimoiy himoyaga muhtoj bolalarni qo‘llab-quvvatlash tizimini yanada kuchaytirish borasida keng ko‘lamli ishlar amalga oshirib kelinmoqda.

Jumladan, Byuroning Toshkent tuman bo‘limi ish yurituvidagi fuqarolik ishlari bo‘yicha Zangiota tumanlararo sudining 18.01.2019 yildagi ijro varaqasiga asosan qarzdor N.Karimovdan undiruvchi Z.Karimova foydasiga qaramog‘idagi ikki nafar farzandlarining moddiy ta’minoti uchun 1/3 qism miqdorida aliment undirish to‘g‘risidagi ijro hujjati mavjud.

Mazkur ijro hujjati yuzasidan olib borilgan ijro harakatlari davomida qarzdor N.Karimov ikki nafar farzandlari 18 yoshga to‘lguniga qadar bo‘lgan aliment qarzdorligi evaziga Toshkent tumanida joylashgan o‘ziga tegishli bo‘lgan turar joyni natura ko‘rinishida undiruvchiga taqdim qilishini bildirib, tomonlarning o‘zaro kelishuvi bilan ushbu turar-joy qarzdor tomonidan qizi Sh.Karimovaning nomiga o‘tkazib berilganligi va qarzdorning farzandlari voyaga yetguniga qadar bo‘lgan aliment to‘lovlari to‘liq bartaraf etilganligi yuzasidan undiruvchidan tegishli tartibda tilxat olingan.