Toshkentdagi xususiy maktabda o‘quvchiga nisbatan majburiy soch olish holati kuzatildi

4 may kuni ijtimoiy tarmoqlarda Toshkentdagi xususiy maktabda 7-sinf o‘quvchisining sochi majburan kal qilib olingani haqida xabar tarqaldi, deb Nova24.uz xabar berdi. Toshkent shahar Maktabgacha va maktab ta’limi boshqarmasi ushbu holat yuzasidan izoh berdi.

Ma’lumotlarga ko‘ra, voqea 2025 yil 28 aprel kuni Sharjah School xususiy maktabida sodir bo‘lgan. Maktab ma’muriyati 7-sinf o‘quvchisiga sochi uzunligi uchun tanbeh bergan. 27 aprel kuni o‘quvchining ota-onasi maktabga chaqirilib, ular bilan suhbat o‘tkazilgan.

Ota-onalar farzandlarining sochini qisqartirishga va’da berishgan. Ertasi kuni o‘quvchi maktabga sochining yon tomonlari olingan holda kelgan. Maktab direktori buni yetarli deb hisoblamay, taekvondo murabbiyiga o‘quvchining sochini kal qilib olishni buyurgan.

29 aprel kuni o‘quvchining ota-onalari maktabga rasmiy shikoyat arizasi bilan murojaat qilishgan. Shu kuni maktab direktori, taekvondo murabbiyi va maktab psixologi o‘quvchining uyiga borib, ota-onalardan uzr so‘rashgan. Psixolog o‘quvchi bilan suhbat o‘tkazgan. Hozirda huquqni muhofaza qiluvchi organlar tomonidan tergov ishlari olib borilmoqda. “Zamin”ni Telegramʻda oʻqing!