Andijon shahrida yuz bergan jamiyatimiz uchun o‘ylantiruvchi voqea bo‘yicha huquq-tartibot organlari tomonidan tergovga qadar tekshiruv ishlari boshlangani ma’lum qilindi.
4 avgust kuni ijtimoiy tarmoqlarda tarqalgan videoyazuv orqali jamoatchilik tomonidan qattiq tanqidlarga sabab bo‘lgan holat bo‘yicha Andijon viloyati IIB rasmiy munosabat bildirdi.
Mazkur videoda o‘rta yoshli erkakning nogahon va o‘zini yo‘qotgancha harakatlar qilib, dori do‘konidagi bolalarga nisbatan haqoratli so‘zlar aytgani va nihoyatda yoqimsiz xatti-harakatlar bilan yosh o‘g‘il bolaga qo‘l ko‘targani aniq ko‘riladi.
Ma’lumotlarga ko‘ra, voqea 26 iyul kuni soat 21:10 atrofida Fitrat ko‘chasidagi “Bobur” mahallasida joylashgan dorixonalardan birida sodir bo‘lgan. 1977 yilda tug‘ilgan fuqaro avval dorixonadagi voyaga yetmagan qiz bilan hazillashgan. Biroq shundan so‘ng vaziyat jiddiy tus olib, o‘sha yerda bo‘lgan o‘smir bilan og‘zaki janjal kelib chiqqan. Shu asnoda erkak bolani haqorat qilib, uning yuziga kafti bilan urgan.
Eng achinarlisi, ushbu jabrlangan o‘smir va uning ota-onasi ushbu voqea yuzasidan ichki ishlar organlariga murojaat qilmagan. Bu esa ko‘pchilikning haqli e’tirozlariga sabab bo‘ldi. Jamiyatda shunga o‘xshash holatlar jim-jit o‘tib ketishi xavfli pretsedent yaratishi mumkinligi ta’kidlanmoqda.
Hozirda Andijon shahar IIB tomonidan ushbu fuqaroga nisbatan qonun doirasida tegishli choralar ko‘rish maqsadida tergovga qadar surishtiruv ishlari olib borilayotgani aytildi.
Shu bilan birga, huquqshunoslar bu kabi holatlarda hatto jabrlanuvchi tomonidan rasmiy shikoyat bo‘lmagan taqdirda ham, videodalillar asosida jinoiy ish qo‘zg‘atilishi mumkinligini ta’kidlashmoqda.
Jamiyatimizda bolalarning xavfsizligi va qadr-qimmati birinchi o‘rinda bo‘lishi kerak. Agar ularga zo‘ravonlik jamoat joyida, butun ko‘z o‘ngida ro‘y bersa va bu jim qolib ketsa, ertangi kunimiz haqida qanday ishonch bilan gapirish mumkin?
Shu sababli, har bir fuqaro bunday holatlarga nisbatan befarq bo‘lmasligi, huquqbuzarlarga nisbatan murosasiz munosabatda bo‘lishi lozim. Balki aynan siz shunga o‘xshash vaziyatda bir bolani himoya qilib qolishingiz mumkin.
“Zamin”ni Telegramʻda oʻqing!
