Qashqadaryoda maktab o‘quvchisi yuk mashinasini haydayotgan paytda ushlandi. Bu voqea ijtimoiy tarmoqlarda keng muhokamalarga sabab bo‘ldi. Yo‘l harakati xavfsizligi xizmati bu holat yuzasidan rasmiy izoh berdi.
Ma’lum qilinishicha, hodisa yuzasidan huquq-tartibot organlari tezkor tekshiruv o‘tkazishgan. Unga ko‘ra, voyaga yetmagan, haydovchilik guvohnomasiga ega bo‘lmagan bola haqiqatan ham yuk mashinasini boshqarib ketayotgani aniqlangan. Uning maktab o‘quvchisi ekani ham tasdiqlangan.
Hayratomuz holat shundaki, yuk mashinasi Angrendan Qashqadaryo viloyatiga harakatlangan va ma’lum bir nuqtada to‘xtagan. Ana shu paytda, haydovchining yaqini — jiyani bo‘lgan maktab o‘quvchisi ruksati bo‘lmasdan, rulga o‘tirgan. Uning bu qilmishi biroz vaqt o‘tgach atrofdagilar tomonidan videoga olinib, ijtimoiy tarmoqlarga joylanadi.
Vaziyatga daxldor bo‘lgan profilaktika inspektorlari zudlik bilan bolakay bilan suhbat o‘tkazgan va ota-onasiga nisbatan tegishli qoidalar asosida rasmiy bayonnoma tuzgan. Qonun buzilishi yuzasidan barcha hujjatlar rasmiylashtirilgan.
Shuningdek, bola haydayotgan yuk mashinasi hozirda maxsus maydonchaga olib ketilgani ma’lum qilindi.
Mas’ullar bu kabi holatlarning oldini olish uchun fuqarolarni o‘z farzandlarining harakatlarini qat’iy nazorat qilishga chaqirishmoqda. Yosh bolalarning ruksati bo‘lmasdan transport vositasini boshqarishi nafaqat qonunbuzarlik, balki juda xatarli oqibatlarga olib kelishi mumkinligi ta’kidlanmoqda.
Ishonilsaki, bu holat boshqalarga saboq bo‘ladi va bolalar xavfsizligi hamda jamiyat tinchligiga nisbatan mas’uliyatli munosabat kuchayadi.
“Zamin”ni Telegramʻda oʻqing!
