Xitoyda ajrashgan juftlik tovuqlarni bo‘lishish uchun g‘aroyib yo‘l tanladi

Xitoyning Sichuan viloyatida yashovchi va fermerlik bilan kun kechiruvchi bir juftlikning ajrashish jarayonida sodir bo‘lgan voqea mahalliy aholi va ijtimoiy tarmoqlarda qizg‘in muhokamaga sabab bo‘ldi.

Ma’lumotlarga ko‘ra, ular bir necha yil davomida qishloqda yashab, chorvachilik bilan shug‘ullangan va uy xo‘jaligida 29 bosh tovuq, 22 bosh g‘oz hamda ikki bosh o‘rdak boqqan. Oiladagi munosabatlar buzilib, rasmiy tarzda ajrashishga qaror qilinganda, ular barcha mol-mulkni, hatto parrandalarni ham mutlaqo teng taqsimlashni istashgan.

Sud jarayonida sudya ikki yo‘lni taklif qilgan:
Birinchisi — ortiqcha bo‘lgan bir bosh tovuqni kimdir sotib olib, boshqa tomonga pul berish orqali masalani hal qilish.
Ikkinchisi — tovuqni so‘yib, birgalikda iste’mol qilish.

Juftlik o‘ylab ko‘rgach, ikkinchi taklifni ma’qul ko‘rgan va shu yerning o‘zida ortiqcha tovuq so‘yilib, teng taqsimlangan holda dasturxonga tortiladi.

Mahalliy matbuot va South China Morning Post nashri yozishicha, bu voqea fermerlar hayotidagi oddiy turmush hikoyasidan ko‘ra ancha ko‘proq ma’noga ega — u ba’zi hollarda odamlar o‘z haq-huquqlarini hatto mayda-chuyda masalalarda ham qat’iylik bilan himoya qilishini ko‘rsatib beradi.

Tomoshabinlar va o‘quvchilar bu voqeani turlicha baholashdi: ayrimlar uni kulgili deb qabul qilsa, boshqalar ajrashishdagi mol-mulk taqsimotiga bo‘lgan jiddiy yondashuvni qadrladi.

Kamola Shuhratova

«ZAMIN.UZ» muharriri