Joriy yilning birinchi yarmida mamlakatimizda ayol-qizlarga nisbatan tazyiq va zo‘ravonlik holatlari keskin ko‘paydi. Oliy Majlis Senati matbuot xizmati ma’lumotiga ko‘ra, o‘tgan yilning shu davriga nisbatan bu ko‘rsatkich 121 foizga oshgan.
Senatning Yoshlar, xotin-qizlar, madaniyat va sport masalalari qo‘mitasi a’zosi Malika Qodirxonova ushbu holat yuzasidan Oila va xotin-qizlar qo‘mitasi raisi Zulayxo Mahkamova nomiga senator so‘rovi yo‘lladi. Unga ko‘ra, maqsad — xotin-qizlar huquqlarini himoya qilish va zo‘ravonlikni oldini olish bo‘yicha amalga oshirilayotgan ishlar samaradorligini o‘rganish.
Raqamlar ortidagi holat
Respublika bo‘yicha 2024 yilning birinchi yarmida 48 303 ta zo‘ravonlik va tazyiq holati qayd etilgan. Bu o‘tgan yilning shu davridagi ko‘rsatkichdan ikki baravar ko‘p. Eng ko‘p holatlar Toshkent viloyatida — 9 414 ta, Buxoroda — 5 612 ta, Qashqadaryoda — 5 268 ta va Andijon viloyatida — 4 808 ta bo‘lgan. Shu davrda 930 nafar ayolga takroriy himoya orderlari berilgan.
Senator tashabbusi
Malika Qodirxonova o‘z so‘rovida qo‘mita va uning hududiy bo‘linmalariga bir qator savollar yo‘llagan. Jumladan, tazyiq va zo‘ravonlikka olib keladigan sabablarni aniqlash, profilaktika ishlarini kuchaytirish, vakolatli organlar bilan hamkorlikni rivojlantirish va mahallalarda bunday holatlarga nisbatan murosasizlik muhitini yaratish bo‘yicha ko‘rilayotgan choralar haqida asoslangan ma’lumot talab qilingan.
Mutaxassislar fikri
Tahlilchilarga ko‘ra, qonunlar va huquqiy mexanizmlar mavjud bo‘lishiga qaramay, muammoning avj olishi jamiyatdagi ayrim ijtimoiy, psixologik va iqtisodiy omillar bilan bog‘liq. Ular nafaqat jazo choralarini kuchaytirish, balki ta’lim, targ‘ibot va yordam markazlarini kengaytirish ham muhim ekanini ta’kidlashmoqda.
“Zamin”ni Telegramʻda oʻqing!
