Toshkent viloyatida yo‘l harakati bilan bog‘liq yana bir noxush voqea qayd etildi. Viloyat Yo‘l harakati xavfsizligi boshqarmasi tarqatgan rasmiy ma’lumotga ko‘ra, 2 sentyabr kuni ertalab 18 yoshli yigit akasining Malibu rusumli avtomobilini haydovchilik guvohnomasiz boshqarib, o‘quvchiga to‘qnashdi.
Hodisa soat 09:30 atrofida Quyi Chirchiq tumani “Sergeli” mahallasi ichki yo‘lida sodir bo‘lgan. Ma’lumotlarga ko‘ra, maktabda o‘qimaydigan, 2007 yilda tug‘ilgan yigit transport vositasini joyidan qo‘zg‘atish paytida yo‘lda ketib borayotgan 2008 yilda tug‘ilgan 11-sinf o‘quvchisini urib yuborgan.
Ishonchli manbalar qayd etishicha, baxtga yarasha piyoda tan jarohati olmagan. Biroq hodisa mahalliy aholi orasida xavotir uyg‘otgan va o‘smirlar tomonidan qonunga xilof holda avtomobil boshqarish qanchalik xavfli oqibatlarga olib kelishi mumkinligini yana bir bor ko‘rsatgan.
Hozirda Malibu avtomashinasi jarima maydoniga olib ketilgan. Quyi Chirchiq tumani IIB Yo‘HXБ tomonidan surishtiruv ishlari olib borilmoqda. Mutasaddilarning ta’kidlashicha, tergov natijalariga ko‘ra aybdor shaxsning javobgarligi belgilanadi.
Mutaxassislar ota-onalarga murojaat qilib, o‘smirlarning transport vositalariga noqonuniy tarzda o‘tirishiga yo‘l qo‘ymaslik zarurligini uqtirmoqda. Chunki bir zumlik bee’tiborlik ko‘p hollarda qayg‘uli oqibatlarga olib kelishi mumkin.
“Zamin”ni Telegramʻda oʻqing!
